Брандт (Brandt) Вилли
Брандт (Brandt) Вилли |
|---|
Брандт (Brandt) Вилли (ному насаби аслиаш: Ҳерберт Эрнст Карл Фрам; 18.12.1913, Любек – 8.10.1992, Берлин) — ходими давлатӣ ва ҳизбии олмонӣ. Баъди хатми гимназия (1932) дар Любек рӯзноманигор буд. Аз соли 1929 узви созмони ҷавонони сотсиалист, баъд аз як сол узви Ҳизби сотсиал-демократии Олмон (ҲСДО) ва аз соли 1931 узви Ҳизби сотсиалистии коргарӣ (ҲСК) буд. Соли 1933, баъди ба сари ҳокимият омадани Ҳитлер фаъолияти ҲСК боздошта шуд. Баъдан ба Брандт ташкил кардани шуъбаи созмони пинҳонкори ҲСК дар Осло супурда шуд. Ӯ то соли 1945 рӯзноманигорӣ мекард. Соли 1945 ба Олмони Ғарбӣ баргашт. Аз соли 1934 ба худ тахаллуси Вилли Брандт гирифта бошад ҳам, вале раёсати полиси Берлин ин тахаллуси ӯро ҳамчун номи расмӣ танҳо соли 1949 эътироф кард. Брандт фаъолияти сиёсии худро соли 1949 ба ҳайси вакили берлинии ҲСДО дар нахустин бундестаги олмонӣ оғоз намуд. Солҳои 50-ум ва 60-ум дар созмони берлини ғарбии ҲСДО мансабҳои гуногун дошт (соли 1950 – узви раёсат, солҳои 1954–1958 – ҷонишини раиси идора, 1958–1963 – раиси идораи ҲСДО-и Берлини Ғарбӣ). Солҳои 1949–1957, 1961, 1969–1992, дар маҷмӯъ 31 сол вакили бундестаг буд. Брандт бургомистри ҳокими Берлин (1957–1966), вазири корҳои хориҷӣ ва ноиби канслер дар ҳукумати эътилофии ҲСДО+Нерӯҳои Масеҳӣ-Демократӣ (1966–1969), канслери федералии Ҷумҳурии Федеративии Олмон (1969–1974), раиси Интернатсионали сотсиалистӣ (1976–1992), узви Парлумони Аврупо (аз соли 1979), раиси Комиссияи мухтори «Шимол–Ҷануб» буд, бунёди «Ҷаҳон ва пешрафт»-ро сарварӣ мекард. Соли 1987 баъди истеъфо аз мансаби раиси ҲСДО раиси ифтихории ҳизб интихоб гардид. Сиёсати вай ба коҳиш додани тундии муносибати байни кишварҳои Аврупои Шарқӣ ва Ғарбӣ нигаронида шуда, бо номи Ostpolitik («Сиёсати шарқӣ») маъруф буд. Барои беҳсозии муносибатҳои байналмилалӣ ба мукофоти Нобел мушарраф гаштааст (10 декабри 1971).
Эзоҳ
[вироиш | вироиши манбаъ]Адабиёт
[вироиш | вироиши манбаъ]- Брандт (Brandt) Вилли // Замин — Илля. — Д. : СИЭМТ, 2018. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 7). — ISBN 978-99947-33-89-9.