Бурҳон Ғурурии Кошонӣ

Бурҳон Ғурурии Кошонӣ

Бурҳон Ғурурии Кошонӣ (форсӣ: برهان غروی کاشانی‎; қарни XVI — қарни XVII) — шоири фор­сизабони Ҳиндустон.

Зиндагинома

Аз со­доти Кошон буд. Дар ҷавонӣ аз зодгоҳаш — Кошон ба Форс, аз он ҷо ба ш. Доробгирд рафт ва дар дарбори ҳукм­ро­ни ин шаҳр Муҳаммадқулихон буд. Муддате дар Ҳай­да­рободи Дакан ва сипас то охири умр дар Синд зин­дагӣ кард. Ба мулозимати Абдурраҳими Хонихонон расида, дар мадҳи ӯ қасидаҳо навиштааст. Доруғаи зарробхонаи Тата шуд ва дар замони Шоҳиҷаҳон (1627−1656) аз олам дар­гузашт. Авҳадӣ бо Ғурурии Кошонӣ дар Эрон ва Ҳин­дус­тон му­лоқот ва дар асараш «Арафоту-л-ошиқин» аз истеъдоди шоирии ӯ ёд намудааст. Аз осораш маснавии «Со­­қи­нома» (176 байт), ки дар он тараннуми шодию хурсан­ди­ҳои зиндагӣ ва табиати дилрабои Ҳиндустон тасвир ёфтаанд, ба тавассути тазкираи «Майхона» то замони мо расидааст. Абё­ти парокандааш дар манбаъҳои адабии «Ма­осири Ра­ҳи­мӣ», «Арафоту-л-ошиқин», «Ништари ишқ», «Оташкада», «Риёзу-л-орифин», «Шоми ғарибон» ва дигар манобеи адабӣ-таърихӣ сабт аст. Ғурурии Кошонӣ пайрави сабки ҳиндӣ буд ва дар шеър табъи баланду зеҳни мус­та­қим дошт. Соҳиб­де­вон буд. Девонашро Абдулбоқии Наҳо­ван­дӣ, муал­лифи тазкираи «Маосири Раҳимӣ» мутолиа намуда, баҳои баланд додааст. Мутаассифона, девонаш то замони мо нара­сидааст. Ашъораш бештар мазмунҳои ирфонӣ ва ҳасби­ҳолӣ доранд.

Абёти зер аз ӯст:

Дар аҳди ҷамоли ту нагиранд зи гул об,
Акси ту ба ҳар об ки афтод, гулоб аст.

Аз бахт чӣ сон шиква тавон кард, Fурурӣ,
Бетолеии аҳли хунар расми қадим аст.

Адабиёт

• Ғурурии Кошонӣ / З. Ғаффорова., С. Имронов // Ғ — Дироя. — Д. : СИЭМТ, 2016. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 5). — ISBN 978-99947-33-67-5.