Гулбек Саодатов

Гулбек Саодатов
Таърихи таваллуд	10 июн 1938(1938-06-10)
Зодгоҳ	ноҳияи Шуғнон, Вилояти мухтори Кӯҳистони Бадахшон, ҶШС Тоҷикистон, ИҶШС
Таърихи даргузашт	28 март 2018(2018-03-28) (79 сол)
Маҳалли даргузашт	Душанбе, Тоҷикистон
Кишвар	ИҶШС  Тоҷикистон
Пеша(ҳо)	навозанда, оҳангсоз
Ҷоизаҳо	Ҳунарпешаи шоистаи Тоҷикистон (1998)

Гулбек Саодатов (10 июни 1938, деҳаи Мун, ноҳияи Шуғнон, ВМКБ — 28 марти 2018, Душанбе) — навозанда ва оҳангсози тоҷик. Ҳунарпешаи шоистаи Тоҷикистон (1998).

Зиндагинома

Омӯзишгоҳи мусиқии шаҳри Душанберо (1966) хатм кардааст. Солҳои 1955—1961 дар ансамбли тарона ва рақси «Помир», 1961—1975 ба сифати навозанда дар Филармонияи давлатии Тоҷикистон кор кардааст, аз соли 1975 мутриби дастаҳои ҳунарии Кумитаи телевизион ва радиои ҷумҳурӣ буд.

Эҷод

Баробари мутрибӣ дар ҳайати навозандагон оҳангҳои зиёд бар ашъори шоирони классику муосири тоҷик, аз мероси халқӣ офаридааст, ки овозхонони касбию ҳаваскор иҷро менамоянд, навоҳои рақсӣ низ зиёд эҷод кардааст. «Файзи саҳар», «Нозанин ёрам», «Гирён макун маро», «Ошиқам», «Гулдаста», «Рақси ёр», «Масти ноз», «Нози ёр», «Баҳорон», «Дилбарҷон», «Аз Бадахшон оӣ», «Ҳамдами хубон», «Зебо», «Нолаи сетор», «Хуршеди дил», «Дуои сабз», «Шабнам», «Гул», «Ту ҳам медонӣ», «Баҳория», «Оби ҷӯ меравад», «Гулбонги бомдод», «Гавҳари ишқ», «Мавҷи дарё», «Вафодорӣ», «Ҷониби ман боз биё», «Давлати висол», «Мутриби хушнаво» аз зумраи беҳтарин оҳангҳояш ба шумор мераванд. Дар ҳайати дастаҳои ҳунарӣ ба бисёр давлатҳои хориҷӣ сафар намудааст.

Ҷоизаҳо

Бо Грамотаи Фахрии Президиуми Совети Олии Тоҷикистон қадр шудааст.

Даргузашт

Гулбек Саодатовшаби 28 марти соли 2018 дар 80-солагӣ даргузашт ва дар оромгоҳи Сариосиёи Душанбе ба хок супурда шуд.

Осор

• Гулбонги навбаҳор, Д., 2011 (ҳаммуалиф).

Адабиёт

• Арбобони фарҳанги тоҷик. Донишнома / Муаллиф-мураттиб Ёрмуҳаммади Сучонӣ. — Душанбе, 2016. — 863 с.