Зиндазой
Зиндазой — дар ҳайвонот, вивипария, усули афзоиш, ки ҳангоми он ҷанин дар батни модар ташаккул ёфта, дар шакли бачаҳои каму беш тараққикарда, бидуни тухмпарда ба дунё меоянд. Зиндазой акси тухмзоӣ буда, онро ба 2 шакли асосӣ – тухмзиндазоӣ ва зиндазойи ҳақиқӣ ҷудо кардаанд. Ҳангоми тухмзиндазоӣ ҷанинҳо дар дохили тухмпарда инкишоф ёфта, аз ҳисоби моддаҳои захиравии тухм ғизо мегиранд. Онҳо аз тухмпарда бевосита пеш аз ба дунё омадан ва ё ҳатто баъд аз таваллуд раҳо меёбанд. Каждум, баъзе мору калтакалосҳо тухмзиндазо мебошанд. Дар ҳолати зиндазойи ҳақиқӣ тухмпардаҳо дар дохили андомгони модар кафида, ҷанинҳо бо девораи роҳи таносули ӯ алоқа пайдо мекунанд ва ба воситаи ҳамроҳак ғизо мегиранд. Дар мавриди зиндазой ҷанин метавонад дар тухмдон, тухмроҳа ё бачадон инкишоф ёбад. Зиндазойи ҳақиқӣ хосси рӯдаковокҳо, бандпойҳо, нармбаданҳо, кирмҳо, сӯзанпӯстҳо, наҳангҳо, ғукҳо, сангпуштҳо, калтакалосҳо, морҳо, ҷонварони халтадор ва ғ. аст.
Эзоҳ
[вироиш | вироиши манбаъ]Адабиёт
[вироиш | вироиши манбаъ]- Зиндазой // Замин — Илля. — Д. : СИЭМТ, 2018. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 7). — ISBN 978-99947-33-89-9.