Зоопланктон

Намояндаи зоопланктон (Diaptomus)

Зоопланктон (аз зоо ... ва юн.-қад. planktos – гумроҳ, беҳаракат) — як ҷузъи планктон, мавҷудоти нофаъоле, ки муқобили ҷараён шино карда наметавонанд ва онҳоро об аз ҷое ба ҷое мебарад.

Ба зоопланктон белпойҳо, мизидҳо, ра­дио­ля­рияҳо, медузаҳо, си­фо­но­фо­ра­ҳо, шонаиҳо, пи­росо­ма­ҳо, инчунин кирминаи беш­та­ри ҳайвонот ва тухми пелагеали (марбут ба қаба­ти ҳаё­тии об)-и моҳӣ мансубанд. Зоопланктонҳо дар тамоми қабат­ҳои об дучор меоянд. Ғизои зоопланктонҳо фитопланктон, детрит ва ҳам­тоё­ни нисбатан хурдашон ме­бошанд. Агар ҷонварон тамоми ҳаёти худро ба шакли планктон гузаронанд, пас онҳоро голопланктон ва агар дар об як қисми зиндаги (давраи кирминагӣ)-ро паси сар кунанд, онҳоро меропланктон меноманд. Зоопланктонҳо ғи­зои асосии биосенози обанборҳо, алалхусус, баҳрҳо мебошанд. Кайки обӣ, босмин, диаптомус ва сиклоп аз ҷум­лаи мав­ҷу­доти маъмули зоопланктонии обҳои ширин буда, дар зе­ри пурбин мушоҳида мешаванд. Зоопланктон яке аз гу­рӯҳ­ҳои нисба­тан сершумори ҳидро­бионтҳо буда, арзиши баланди эко­ло­гӣ ва хоҷагӣ дорад. Зоопланктонҳо моддаҳои органикии обан­бор­ҳо­ро истеъмол карда, обро тоза нигоҳ медоранд. Он­ҳо ғи­зои бисёр моҳиҳо ва индикатори асосии арзёбии сифати об мебошанд. Бо роҳи афзун намудани зоопланктон метавон соҳаи моҳидориро ривоҷ дод.

Адабиёт

• Зоопланктон // Замин — Илля. — Д. : СИЭМТ, 2018. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 7). — ISBN 978-99947-33-89-9.