Зоғобӣ

Зоғобӣ
Таснифи илмӣ
Номи илмӣ
ХАТО Параметри лотинӣ набояд холӣ бошад
Викианбор

Зоғобӣ (лот. Myophonus caeruleus) — як навъ паранда. Ман­суби оилаи дурроҷиҳост.

Зоҳиран ба зоғи сиёҳ ша­боҳат дошта, танҳо бо болу пари кабудрангаш аз он фарқ мекунад. Дарозиаш 320–342 мм, болаш 178–185 мм, думаш 140–150 мм, вазнаш 130–195 г (модинааш хурдтар аст). Парҳои фарқи сар, гардан ва тани зоғобӣ сиёҳ буда, нӯги онҳо ҷило медиҳад. Нӯ­лаш зард, пойҳояш сиёҳ. Зоғобӣ дар Афғо­нистон, Ҳин­дус­тон, Хитой, Покистон, Таиланд, Маҷо­рис­тон ва Осиёи Марказӣ во­мехӯрад. Дар То­ҷи­кис­тон дар нишебиҳои қ-кӯҳ­ҳои Қурама, Туркистон, Зарафшон, Ҳисор, Қаро­тегин, Дарвоз, Пётри I, Шуғнон, Ванҷ ва Вахон (дар балан­диҳои 1100–2800 м аз с. б.) маскун аст. Парандаи гар­ми­дӯст бу­да, бештар дар назди­киҳои об, ҷой­ҳои соя ва зери шахпораҳои ба дарё наздик аз ушнаву решаву пояи рустаниҳо лона месозад (онро 10–12 сол истифода мебарад). Ба лонаи зоғобӣ бояд нури офтоб ва чак­раҳои об расад. Ҷуфти зоғобӣ доимӣ буда, тамоми сол онҳо яз якдигар ҷудо намешаванд. Модинааш охир­ҳои май – аввалҳои июн 4–5 тухм (рангаш сафед буда, холҳои ҷигарӣ дорад) мегузорад. Тухмҳоро бештар зоғобӣи модина мехобонад (16–17 рӯз). Моҳи июл чӯҷаҳои зоғобӣ парвозӣ мешаванд. Ғизои зоғобӣ ҳашарот ва кирминаи он­ҳост; зимистон тухму меваи рустаниҳоро мехӯрад. Зоғобӣ дар солҳои сербарф аз ҷойҳои лонагузории худ ба ҳам­во­риҳо мекӯчад. Зоғобӣ ба «Китоби сурхи Ҷум­ҳурии Тоҷикистон» дохил карда шудааст. Барои лонагузорӣ ва зиёд кардани шумораи зоғобӣ шароити мам­нӯъгоҳи «Ромит», пар­варишгоҳҳои «Қӯсав­лисой», «Санг­вор» ва Пойгоҳи ботаникии кӯҳии Кондара му­соид аст.

Адабиёт

• Зоғобӣ // Замин — Илля. — Д. : СИЭМТ, 2018. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 7). — ISBN 978-99947-33-89-9.