Ибни Аввом

Ибни Аввом
Таърихи таваллуд	асри XII
Зодгоҳ	Севиля
Таърихи даргузашт	асри XII
Кишвар	Андалус

Абузакариё Яҳё ибни Муҳаммад ибни Аҳмад ибни Аввом (ар. أبو زكريا يحيى بن محمد بن أحمد بن العوام‎; асри XII, Севиля — асри XII) — кишоварзи мусулмони араб, яке аз донишмандони асрҳои миёна.

Зиндагниома

Нимаи дуввуми асри 12 дар Севиля (Испониё) ба дунё омадааст. Муаллифи рисолаи «Китобу-л-филоҳа», ки аз 25 боб иборат буда, оид ба кишоварзӣ, чорводорӣ, парандапарварӣ ва занбӯрпарварӣ маълумоти муфассал медиҳад. Дар он зиёда аз 585 намуди рустанӣ ва беш аз 50 намуди дарахти мева тавсиф ёфтааст. Китоб ҳамчунин оид ба киштукор, истифодаи нурӣ, тарзи пайванд кардан, касалиҳои рустанӣ ва роҳҳои пешгирии онҳо маълумот медиҳад. Муаллиф ҳангоми навиштани китоб аз сарчашмаҳои юнонӣ ва арабӣ, хосса рисолаи Ибни Ваҳшия андар кишоварзии аҳли Набат истифода ва ба он аз таҷрибаҳои ҳамасрони худ маълумоти бисёр ворид кардааст. «Китобу-л-филоҳа» ибтидои асри 19 ба забони испанӣ тарҷума ва нашр шудааст.

Адабиёт

• Ибни Аввом // Замин — Илля. — Д. : СИЭМТ, 2018. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 7). — ISBN 978-99947-33-89-9.