Мавод аз Википедиа — донишномаи озод
Империяи Руми Муқаддас (аз соли 1512 — Империяи Руми Муқаддаси олмониҳо , лот. Sacrum Imperium Romanum Nationis Germanicae / Sacrum Imperium Romanum Nationis Teutonicae , олмонӣ : Heiliges Römisches Reich Deutscher Nation Аврупои Ғарбӣ ва Марказӣ (962—1806). Асосгузораш император Оттони I (аз 962) буд, ки онро мероси империяи Карли I Кабир ва Руми Ғарбӣ медонист.
Империя аз чандин ҳукумати мустақили шоҳӣ ва герсогӣ иборат буд. Императорони он ашрофи олмонӣ буданд. Таъсиси империя бояд барои устувор шудани нуфузи сиёсии Оттони I дар Лотарингия ва қаламрави собиқ давлати Каролингҳо мусоидат мекард. Империяи Руми Муқаддас дар асрҳои X—XIII ба авҷи қудрат расида, ба ҳайати он Олмон , Австрия , Словения , Шветсия , Лихтенштейн , Белгия , Ҳолландия , Люксембург , Чехия , Фаронсаи Шарқӣ, Италияи Шимолӣ ва Полшаи Ғарбӣ дохил мешуданд. Аз асри XI муборизаи императорон бо папаи Рум шиддат ёфта, дар натиҷаи он сарзамини Италия аз ҳайати империя хориҷ карда шуд (нимаи дуввуми асри XIII) ва нуфузи ҳукуматҳои мустақил устувор гардид. Аз асри XIII императорро коллегияи курфюрстҳо интихоб мекарданд. Соли 1438 дар империя сулолаи Габсбургҳо ба сари қудрат омад. Дар асрҳои XV—XVI парокандагии сиёсии Империяи Руми Муқаддас авҷ гирифт: кӯшишҳои анҷом додани ислоҳот барои мутамарказ кардани ҳокимияти марказӣ ва ҷорӣ намудани боҷи императорӣ чандон натиҷа надоданд. Баъди Ҷанги сисола (1618-48) ва сулҳи Вестфал (1648) ҳукумати император бо ном боқӣ монда, Империяи Руми Муқаддас дар рафти ҷангҳои Наполеон барҳам хӯрд. Соли 1806 охирин императори Империяи Руми Муқаддас Франси II (1792—1806) аз ҳукумат даст кашида, расман тоҷу тахти империяи Австрияро соҳиб гардид.
.svg)
