Мамадҷон Маҳкамов

Мавод аз Википедиа — донишномаи озод
Jump to navigation Jump to search

Маҳкамов Мамадҷон (тав. 07.09.1951, деҳаи Понғози ноҳияи Ашт), риёзидон, номзади илмҳои педагогӣ (1993), дотсент (2001).

Зиндагинома[вироиш]

Соли 1974 факултети механикаю математикаи Донишгоҳи давлатии Тоҷикистон ба номи В. И. Ленинро хатм кардааст. Солҳои 1974–1980 лаборанти калон ва ходими хурди илмии лабораторияи масъалавии таълими барномавии донишгоҳи мазкур, 1980–1986 муаллими кафедраи методикаи таълими математика, 1986–1989 аспиранти кафедраи номбурдаи донишкадаи омӯзгории пойтахт буд. Солҳои 1989–1994 ҳамчун муаллими калон, 1994–1997 дотсент, 1997–2000 мудири кафедраи методикаи таълими математикаи Донишгоҳи давлатии омӯзгории Тоҷикистон ба номи Қ. Ҷӯраев кор кардааст. Ҳамзамон солҳои 1997– 2000, 2002–2006 сардори шӯъбаи таълими донишгоҳи омӯзгорӣ буд. Солҳои 2000–2002 дар Маркази идораи лоиҳаи кредитии назди Вазорати маорифи Тоҷикистон кор кардааст. Аз соли 2007 ҳамчун сардори Идораи хадамоти методии муассисаҳои таҳсилоти миёна ва олии касбии Маркази ҷумҳуриявии таълимию методии назди Вазорати маорифи Тоҷикистон фаъолият дорад. Оид ба ташаккулдиҳии методҳои ҷамъбасткунӣ дар ҳалли муодила ва нобаробариҳо дар курси алгебраи мактабҳои асосӣ кори илмӣ бурдааст. Муаллифи зиёда аз 80 номгӯи корҳои илмию методӣ, аз ҷумла 35 дастурҳои таълимиву методӣ, беш аз 50 мақолаву фишурдаҳои илмӣ, илмию методӣ ва илмию оммавӣ мебошад. Дар такмил, таҳия, ташхису татбиқи нақшаҳои таълимии донишгоҳҳо ва коллеҷҳои ҷумҳурӣ, стандартҳои давлатии таҳсилот ва гузаштан ба таълими бисёрзинагӣ саҳми арзанда дорад.

Мукофот[вироиш]

Бо нишони сарисинагии «Аълочии маорифи Тоҷикистон» (1999) ва ордени «Шараф» дараҷаи 2 (2004) сарфароз карда шудааст.

Осор[вироиш]

  • Супоришҳо барои санҷиши дониши математикӣ (бо ҳаммуаллифӣ), Д., 1991;
  • Тарзҳои гуногуни ҳалли муодилаҳои тригонометрӣ, Д., 1999;
  • Тарзҳои гуногуни ҳалли муодилаҳои дараҷаи 3 ва 4, Д., 2002;
  • Роҳнамои математикаи мактабӣ (бо ҳаммуаллифӣ), Д., 2004, 2009;
  • Тарзҳои гуногуни табдилоти ифодаҳои тригонометрӣ (бо ҳаммуаллифӣ), Д., 2005.

Пайвандҳои беруна[вироиш]