Юрий Израилович Бобоев

Мавод аз Википедиа — донишномаи озод
Jump to navigation Jump to search
Юрий Израилович Бобоев

Юрий Израилович Бобоев (тав. 02. 11. 1917, ш. Самарқанд – ваф. 1996, ИМА), адабиётшиноси маъруфи тоҷик, дотсент (1953), «Муаллими хизматнишондодаи мактаби ҶШС Тоҷикистон» (1977), нишони «Аълочии маорифи Тоҷикистон» (1964), аъзои Иттифоқи нависандагони Тоҷикистон (1956).

Зиндагинома[вироиш]

Соли 1938 факултети коргарии ба номи Сталини назди Донишгоҳи давлатии Самарқанд ва соли 1945 Донишгоҳи давлатии Самарқанд ба номи А. Навоиро хатм кардааст. Солҳои 1932–1937 ҳамчун корманди адабии рӯзномаҳои «Барои коллективӣ», «Пионери Тоҷикистон», «Барои маорифи коммунистӣ», «Комсомоли Тоҷикистон», «Ҳақиқати Ӯзбекистон», 1936– 1937 котиби масъули рӯзномаи «Октябр», 1945–1946 котиби илмии Институти таърих, забон ва адабиёти тоҷики филиали АИ ИҶШС ва муаллими Донишкадаи хоҷагии қишлоқи Тоҷикистон кор кардааст. Аз соли 1947 муаллим, 1948–1951 аспиранти кафедраи адабиёти тоҷики Донишкадаи давлатии омӯзгории ш. Душанбе ба номи Т. Г. Шевченко буд. То соли 1992 ҳамчун дотсенти кафедраи адабиёти тоҷики донишкадаи номбурда кор кардааст. Таҳти роҳбарии ӯ якчанд нафар рисолаҳои номзадияшонро ҳимоя кардаанд. Дар масъалаҳои гуногуни адабиёти тоҷик як силсилаи асарҳо дорад. Муаллифи зиёда аз 350 мақолаҳои илмӣ, илмию оммавӣ дар масъалаҳои муҳими таъриху назарияи адабиёти тоҷик мебошад. Аз ҷумлаи онҳо «Мирзо Турсунзода» (1961), «Партия, забон ва адабиёт» (маҷмӯаи мақолаҳо, 1964), «Садриддин Айнӣ» (1968), «Сипаҳсолори назм» (1971) мебошад. Дар таълиф ва тартиб додани китобҳои дарсии «Муқаддимаи адабиётшиносӣ» (барои мактабҳои олӣ) (1974) (бо таҳриру иловаҳо 1987, 1992), «Адабиёти советии тоҷик» (барои синфи 10-ум, бо ҳаммуаллифӣ) (1952), «Русская литература» (барои синфи 8-уми мактаби тоҷикӣ, бо ҳаммуаллифӣ) (1966), ҷилди сеюми асари шашҷилдаи М. Турсунзода ва осори дуҷилдаи ҷашнии шоир (1980–1981) ширкат намудааст. Инчунин мутарҷими асарҳои В.Карпинский «Мамлакати мо чӣ хел идора мешавад» (1940), Л. Благой «Пушкин – шоири бузурги миллии халқи рус» (1949 ), Л. Гумилёвский «Болҳои қиркунанда» (1951) буд. Бо унвони «Муаллими хизматнишондодаи мактаби ҶШС Тоҷикистон» (1977), нишони «Аълочии маорифи халқ» (1964), ду медал ва ифтихорномаҳои Президиуми Шӯрои Олии ҶШС Тоҷикистон мукофотонида шудааст.

Осор[вироиш]

  • Жанри таърихӣ ва романи «Ғуломон»-и С.Айнӣ, Д., 1948;
  • Асосгузори адабиёти советии тоҷик, Д., 1968;
  • Сарояндаи сарзамини офтобӣ, Д., 1978;
  • Эстетика ва қадамҳои насру назми тоҷик, Д., 1988;
  • Дар бораи тарҷумаи асарҳои В.Маяковский // Шарқи Сурх, 1950, № 4;
  • «Ёддоштҳо»-и С.Айнӣ (китоби 1 ва 2) // Шарқи Сурх, 1950, № 6;
  • Садои дили шоир // Шарқи Сурх, 1961, № 8;
  • Сухан дар бораи шеърҳои нави шоир // Шарқи Сурх, 1969, № 10;
  • Аҳамияти ҷаҳонии адабиёти советӣ // Мактаби советӣ, 1971, № 12;
  • Қувваи ҷонбахши адабиёт //Шарқи сурх, 1964, № 4;
  • Ду проблемаи адабиёт // дар кит. Вопросы современной таджикской литературы, 1971.

Пайвандҳои беруна[вироиш]