Гадобой Собиров
Гадобой Собиров (1.12.1928, ноҳияи Ӯроттеппа — 6.10.1976) — риёзидон, номзади илмҳои физика-математика (1963), дотсент (1966), асосгузор ва аввалин мудири кафедраи геометрия дар донишкадаи омӯзгорӣ.
Зиндагинома
[вироиш | вироиши манбаъ]Соли 1960 факултети физика-математикаи Донишкадаи давлатии омӯзгории ш. Душанбе ба номи Т. Г. Шевченкоро хатм кардааст. Солҳои 1960—1962 аспирант, 1962—1964 ассистент, 1964—1965 муаллими калони кафедраи математика, 1965—1968 мудири кафедраи математикаи элементарӣ ва методикаи таълими математика, 1968—1972 дотсенти кафедраи назарияи ададҳо ва математикаи ҳисоббарории донишкадаи омӯзгории пойтахт буд. Аз соли 1972 то охири умр ҳамчун мудири кафедраи геометрияи донишкадаи номбурда фаъолият дошт. Оид ба эҷодиёти Алоуддин Ибни Муҳаммад Алӣ ал- Қушчӣ ва фаъолияти ӯ дар инкишофи илми математика дар Шарқи Наздик ва Миёна, инчунин дигар масъалаҳои муҳими соҳаи математика корҳои илмӣ анҷом додааст. Муаллифи 4 асари калонҳаҷми илмӣ ва зиёда аз 40 мақолаҳои илмӣ, илмию методӣ мебошад. Ӯ дар рушду нумӯи илми математика, бахусус таърихи математикаи Осиёи Марказӣ хидмати арзанда кардааст.
Осор
[вироиш | вироиши манбаъ]- Инкишофи математика дар Осиёи Миёна (асрҳои XV—XVII), Д., 1966;
- Ҳамкории эҷодии олимони Осиёи Миёна ва мактаби илмии Улуғбек дар Самарқанд, Д., 1973;
- Тараққиёти назарияи муодила дар Осиёи Миёна // Мактаби советӣ, 1962, № 10.