Благовешенск

БЛАГОВЀШЕНСК, шаҳр дар Россия, маркази маъмурии вил. Амур. Дар қисми ҷан. ғарбии дашти байни деҳаҳои Зея ва Бурея, дар соҳили д. Амур ва резишгоҳи д. Зея ҷойгир аст. Бандари дарёӣ ва аэропорти байналмиллалӣ дорад. Аҳолиаш 219861 нафар (2010). Масоҳ. 320,97 км2. Истгоҳи охирини р. о.-и Белогорск–Сибир (Транссибир). Маркази роҳҳои автомобилии Белогорск, Свободний, Завитинск, Райчихинск буда, тобистон гузар­гоҳи киштиҳои Благовешенск – Хэйхэ (Хитой) фаъол мешавад ва рафтуомад барои ин ду шаҳр бе раводид (виза) сурат мегирад. Благовешенск с. 1856 ҳамчун дидбонгоҳи ҳарбии Уст-Зея бунёд ёфта, с. 1858 ба шаҳр табдил ёфт. Ба шарафи калисои Благовешения номгузорӣ шудааст. Солҳои 1920–26 маркази губ. Амур, 1926–32 маркази округи Амур дар ҳайати кишвари Шарқи Дур (аз 1938 кишвари Хабаровск). Аз 1948 маркази мустақили вил. Амур. Благовешенск маркази серсоҳаи саноати кишвар аст; корхонаҳои бузургаш: з-дҳои «Амурский металлист» (аз 1893, истеҳсоли таҷҳизот барои истихроҷи маъдан ва тило), киштисозӣ (аз 1887), «Амурэлектроприбор». Истеҳсоли таҷҳизоти электротехникӣ, саноати сабук, хӯрокворӣ (коркарди рустаниҳои лӯбиёӣ ва нӯшобаҳои спиртӣ), саноати коркарди чӯбу тахта ба роҳ монда шудааст. Дар Благовешенск Донишгоҳи давлатии Амур, Донишгоҳи давлатии омӯзгории Благовешенск, донишгоҳи аграрӣ ва Институтинизомии Шарқи Дур, академияи тиббӣ, 15 мактаби касбию миёна, Институтитаҳқиқоти илмии Амур, Маркази илмии физиология ва паталогияи роҳҳои нафас, осорхонаи кишваршиносӣ (1891), театрҳои драмавӣ (1883) ва лух­так фаъолият доранд. Дар ох. с-ҳои 40 а. 20 дар Благовешенск скелети динозавр ёфт шудааст.

Сарчашма

Энсиклопедияи миллии тоҷик, ҷилди 2