Бозиҳои кӯдакон

Бозиҳои бачагон — яке аз воситаҳои тарбияи фикрӣ, ахлоқӣ, ҷисмонӣ ва зебоишиносии бачаҳо.

Дар бозӣ ҳолатҳои рӯҳӣ: эҳсосот, идрок, тафаккур, хаёл, хотира, ирода ва ғайра инкишоф меёбад. Дар бозиҳои бачагон мазмуни фаъолияти калонсолон инъикос меёбад ва онҳо се хусусият доранд: бача бозиро озод ва бо майли худ иҷро мекунад; дар бозӣ ширкат карда, эҷодкорӣ менамояд; дар бозӣ саргарм шуда ба завқ меояд ва дар вай ҳисси дӯстию рафоқат меафзояд.

Гурӯҳбандии бозиҳо

Бозиҳои бачагон ба бозӣ бо бозичаҳо, бозиҳои тақлидӣ, серҳаракат ва бозиҳои дидактикӣ тақсим мешавад:

• бозӣ бо бозичаҳо асосан ба бачаҳои синну соли мактабӣ хос аст (масалан, шақшақабозӣ, регбозӣ ва ғайра);
• дар бозиҳои тақлидӣ бачаҳо ба фаъолияти бузургсолон тақлид мекунанд (ронанда, духтур, фурӯшанда ва ғайра). Ин бозиҳо воқеаҳои муҳити атрофи бачаҳоро акс менамоянд. Баробари камолоти бачаҳо бозиҳояшон ҳам мураккаб мешавад;
• бозиҳои серҳаракатро бачаҳо танҳо ё гурӯҳ-гурӯҳ иҷро мекунанд (масалан, чашмбандак, акколбозӣ, аскарбозӣ ва ғайра). Ин бозиҳо бештар ба бачаҳои синни мактабӣ хос буда, саломатию иродаи онҳоро мустаҳкам ва қобилияташонро афзун мекунанд;
• бозиҳои дидактикӣ барои тарбияи ақлии бачаҳо аҳаммият доранд ва бештар ба бачаҳои гурӯҳи калони боғча ва талабагони синфҳои ибтидоӣ хоссанд (лотобозиҳои махсус, чистон ва ғайра). Дар ин бозиҳо эҳсос, идрок, диққат, хотир инкишоф меёбад.

Адабиёт

• Луғати тафсирии истилоҳоти педагогика. Д., 1988.

Сарчашма

• Бозиҳои бачагон // Боз — Вичкут. — Д. : СИЭМТ, 2014. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 3). — ISBN 978-99947-33-46-0.