Зоҳидаи Хонанда
Зоҳидаи Хонанда (форсӣ: زاهده خواننده; ? — қарни XII) — хонанда ва ромишгари форс-тоҷик.
Эзоҳ[вироиш | вироиши манбаъ]
Зиндагӣ ва фаъолияти эҷодию иҷрои Зоҳидаи Хонанда дар Ҳироту Ғазна гузаштааст. Асосҳо ва нозукиҳои шеъру мусиқиро аз падару модараш фаро гирифта буд. Дар сароидани шаклу навъҳои шеърию мусиқӣ ва тарона номвар шуда, дар сурудани ашъори ирфонӣ низ назди дӯстдорони шеъру мусиқӣ эътибори хосса дошт. Ӯ дар санъати сарояндагӣ сабки махсус дошта, ба суннатҳои деринаи эҷоду иҷрои ҳавзаҳои Хуросону Мовароуннаҳр низ такя мекард. Муҳаммад Авфии Бухороӣ дар китоби «Лубобу-л-албоб» чунин навиштааст: "Дар Ҳарӣ зани мутрибае бо номи Зоҳидаи Хонанда номвар буда. Дар маҷлиси Амир Носируддини Санҷарӣ ҳозир буд. Тӯтисухане, ки чун шакар аз писта равон кардӣ, тарбияти қуввати равон кардӣ ва чун даҳ ангуштро барои мадади қавлу ғазал дар амал овардӣ, ғоратгари инсу ҷон кардӣ. Ва он амир ин рубоӣ дар ҳаққи ӯ гуфтааст:
Чашму рухи ту ба дилбарӣ истоданд,
Ангуштонат дари тараб бигшоданд.
Эй Зоҳида! Зоҳидон зи чанги хуши ту
Чун наргиси ту масту хароб афтоданд.
Зоҳидаи Хонанда дар сароидани жанру шаклҳои шеърию мусиқии тарона, қавл, ғазал ва маҷмӯаи мусиқии устодонаи «Хусравонӣ» дар ҳавзаҳои ҳунарии Ҳироту Ғазна ва берун аз он шуҳрати зиёд дошт.
Эзоҳ[вироиш | вироиши манбаъ]
Адабиёт[вироиш | вироиши манбаъ]
- Зоҳидаи Хонанда / А. Раҷабов // Замин — Илля. — Д. : СИЭМТ, 2018. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 7). — ISBN 978-99947-33-89-9.
- حدادی نصرتالله. فرهنگنامه موسیقی ایران. تهران، ۱٣٧٦ ش