Эшони Абдулбасир
| Эшони Абдулбасир | |
|---|---|
| Иттилооти инфиродӣ | |
| Касб, шуғл: | ходими дин |
| Таърихи таваллуд: | 3 ноябр 1963 (60 сол) |
| Зодгоҳ: | |
| Падар: | Эшони Абдурраҳмонҷон |
 Вироиши Викидода | |
Эшони Абдулбасир (Абдулбасир Саидзода; 3 ноябри 1963, деҳаи Қандак, Обигарм, ноҳияи Файзобод) — рӯҳонӣ, муовини аввали Раиси Шӯрои уламои Маркази исломии Ҷумҳурии Тоҷикистон[1].
Зиндагинома
[вироиш | вироиши манбаъ]Абдулбасир Саидзода 3 ноябри соли 1963 дар деҳаи Қандаки Обигарми ноҳияи Файзобод дар оилаи пешвои тариқати нақшбандия Эшони Абдурраҳмонҷон ба дунё омадааст. Таълими ибтидоии диниро дар назди падари бузургвораш гирифтааст. Баъд аз хатми мактаби миёна бо дастури падараш муддати чаҳор сол дар назди махдуми Бурҳонуддин таълим гирифта, як қатор дарсҳои динӣ аз қабили сарфу наҳв ва фиқҳро аз худ мекунад. Баъдан дар назди домулло Ҳикматуллоҳ таҳсилашро идома дода, муддати ҳафт сол тафсири Қуръони карим, ҳадис, ақоид, усул, маъонӣ, мантиқ, адабиёт ва дигар улуми диниро меомӯзад. Ҳамин тариқ номбурда аз устодони асил таълиму тарбия гирифта, дар соҳаи илму адаб ба пояи камол расида ва ахлоқи ҳамидаро касб кардааст.
Абдулбасир Саидзода фаъолияти корияшро дар муассисаҳои динӣ аз соли 2000-ум шурӯъ намудааст. Номбурда ба даъвати собиқ муфтии ҷумҳурӣ марҳум шайх Амонуллоҳ Неъматзода дар масҷиди ҷомеъи «Шоҳмансур»-и шаҳри Душанбе ба ҳайси имомхатиб кор ва фаъолияти худро оғоз мекунад. Аз соли 2002 ба ҳайси узви Шӯрои уламои Ҷумҳурии Тоҷикистон пазируфта мешавад. Аз соли 2006 ба вазифаи сархатиби масҷиди ҷомеъи «Шоҳмансур»-и ноҳияи Шоҳмансури шаҳри Душанбе ва ҳамзамон аз соли 2010 то ҳол ба ҳайси муовини аввали Раиси Шӯрои уламои Ҷумҳурии Тоҷикистон ифои вазифа карда истодааст.
Абдулбасир Саидзода дар риштаи эҷоду таълиф низ маҳорати хубе дорад. Соли 2010 китоби ӯ бо номи «Фармудаи уламо аз аҳодиси Мустафо ва каломи Худо» ба табъ расид, ки муҳтавои он роҷеъ ба баъзе масоили зарурии шаръӣ баҳс мекунад. Ҳамчунин мақолаҳои зиёде дар мавзӯъҳои гуногун навишта, дар боби ахлоқу одоби шаръӣ мавъизаҳои фаровоне ба сабт расонидааст. Номбурда дар эҷоди шеър низ маҳорат дорад ва ашъоре чанд дар наъти Пайғамбари Худо (с), васфи Маккаи Мукаррама ва Мадинаи Мунаввара ва дигар мавзӯъҳои гуногун эҷод кардааст.
Абдулбасир Саидзода дар муддати фаъолияти корияш ҳамчун намояндаи Маркази исломии Ҷумҳурии Тоҷикистон ба кишварҳои хориҷ аз қабили Русия, Туркия, Кувайт, Эрон, Арабистони Саъудӣ ва ғайра сафарҳои хидматӣ анҷом дода, дар баромадҳои худ аз дину мазҳаб дифоъ намудааст. Дар сафари корие, ки дар пойтахти Чеченистон шаҳри Грозний баргузор гардида буд, дар мавзӯъи «Ислом дини сулҳу ваҳдат аст» баромад намуд, ки аз ҷониби ҳозирин мавриди писанду таҳсин қарор гирифт.
Абдулбасир Саидзода бо якчанд ифтихорномаҳои давлатӣ сарфароз гардидааст.
Эзоҳ
[вироиш | вироиши манбаъ]- ↑ Аъзои Шӯрои уламои Маркази исломӣ — Маркази Исломии Ҷумҳурии Тоҷикистон. shuroiulamo.tj. 6 май 2021 санҷида шуд. Баргирифта аз сарчашмаи аввал 6 май 2021.