Биопсия

Мавод аз Википедиа — донишномаи озод

Биопси́я (аз юн.-қад. βίος — ҳаёт + ὄψις — дидан, таҳқиқ) — бо мақсади ташхиси беморӣ бурида гирифтани порчае аз бофтаи организми зинда.

биопсия имкон медиҳад, ки тағйироти нонамоёни организм муайян ва дар асоси он хусусиятҳои беморӣ (мас., илтиҳоб, омос ва ғайра) бармаҳал ошкор карда шаванд. Биопсия дар соҳаҳои гуногуни тиб, мас., ҷарроҳӣ, урология, онкология, гематология, гастроэнтерология, иммунология ва ғ. кор фармуда мешавад. Барои биопсия қариб аз ҳама узвҳо бофта гирифтан мумкин аст. Бофтаро бо роҳи ҷарроҳӣ, сӯзанхалӣ ва аспиратсия мегиранд. Биопсияи аспиратсиявӣ дар ташхиси трахея ва бронхҳо истифода мешавад (бо ёрии сӯзан ё ягон асбоби махсус муҳтавои организмро мегиранд). Биопсияро бо роҳи «тарошида» гирифтани сатҳи бофта низ мегузаронанд. Ин гуна усули биопсия дар мавриди муоинаи луобпарда ва гарданаи бачадон корбаст мешавад. Биопсияи оҷил (экспресс-биопсия) низ мавҷуд аст. Онро дар вақти амалиёти ҷарроҳӣ ба кор мебаранд. Имкониятҳои биопсия бинобар ривоҷи техникаи эндоскопӣ (ниг. Эндоскопия), ки барои бевосита гирифтани парчаҳои луобпардаи меъда, рӯда, бронхҳо, пешобдон ва ғ. шароити мусоид фароҳам меорад, зиёд гаштанд. Биопсия дар муассисаҳои тиббӣ ба ҷо оварда мешавад. Ҳангоми биопсия ба қоидаҳои тозагӣ қатъӣ риоя менамоянд. Бофтаи аз организм гирифтаро барои ташхис омода месозанд.

Биоспия дар Тоҷикистон[вироиш | вироиши манбаъ]

Дар Тоҷикистон дар кори татбиқи биопсияи ҷигар саҳми олимони Институти гастроэнтерология назаррас мебошад. Кормандони институт зери роҳбарии акад. АИ ҶТ Ҳамид Мансуров дар ИҶШС яке аз аввалинҳо шуда ба ин амал даст заданд. Онҳо дар робита ба биопсия «Атласи таҳқиқи гистологии ҷигар»-ро ба табъ расондаанд.

Эзоҳ[вироиш | вироиши манбаъ]

Адабиёт[вироиш | вироиши манбаъ]

  • Мансуров Х. Х. Биопсия печени. Д., 1964;
  • Мансуров Х. Х. Атлас гистологических исследований печени. Д., 1964;
  • Пушкарь Д. Ю. Диагностические возможности биопсии простаты // Урология, 2002, № 6;
  • Русаков И. Г. (ва диг.). Биопсия предстательной железы. М., 2004;
  • Пушкарь Д. Ю., Говоров А. В. Биопсия предстательной железы. М., 2010.

Сарчашма[вироиш | вироиши манбаъ]