Дилрабо Мансурова

Мавод аз Википедиа — донишномаи озод
Jump to navigation Jump to search
Дилрабо Мансурова
Дилрабо Сайдуллоевна Мансурова
Mansurova dilrabo.jpg
Дилрабо Сайдуллоевна Мансурова
Санаи таваллуд:

29 январ 1974(1974-01-29) (45 сол)

Зодгоҳ:

Хуҷанд, ҶШС Тоҷикистон, СССР

Мамлакат:

 Тоҷикистон

Фазои илмӣ:

технология

Дараҷаи илмӣ:

доктори илмҳои техникӣ

Унвонҳои илмӣ:

профессор

Ҷоизаҳо:

Аълочии маорифи Тоҷикистон (2010), Ҷоизаи Академияи илмҳои Ҷумҳурии Тоҷикистон ба номи С. Умаров

Медали нуқраи симпозиуми байналмиллалии занони ихтироъкор, шаҳри Сеули Кореяи Ҷанубӣ (2013)

Дилрабо Сайдуллоевна Мансурова - олим, доктори илмҳои техникӣ, профессори Донишкадаи политехникии Донишгоҳи техникии Тоҷикистон ба номи академик М.Осимӣ дар ш. Хуҷанд (2014), Аълочии маорифи Тоҷикистон (2010), вакили Маҷлиси намояндагони МО ҶТ даъвати V (2015).[1]

Зиндагинома[вироиш]

Мансурова Дилрабо Сайдуллоевна 29 январи соли 1974 дар шаҳри Хуҷанд таваллуд шудааст. Баъд аз хатми Филиали Хуҷандии Донишгоҳи техникии Тоҷикистон ба номи академик М. Осимӣ аз моҳи маи соли 1997 ҳамчун лаборанти калони кафедраи иқтисодиёт ва идора фаъолияти меҳнатиашро оғоз бахшидааст. Соли 1997 ӯ фаъолияти худро ҳамчун олим ва педагог аз ассистенти кафедраи технологияи матоъ, кешбофӣ ва маҳсулоти дӯзандагии Филиали Хуҷандии Донишгоҳи техникии Тоҷикистон ба номи академик М. Осимӣ шурӯъ карда, баъдан чун сармуаллим ва аз соли 2001 то 2008 ба сифати мудири кафедраи номбурда фаъолият бурдааст. Соли 2004 рисолаи номзадии худро аз рӯи ихтисоси 05.02.18 Назарияи мошинҳо ва механизмҳо дар мавзӯи «Коркард ва асоснокии бузургиҳои механизми бадандиҳандаи ресмони поёнии мошинҳои чокдӯзии дуресмонаи занҷирмонанд» дар Шӯрои диссертатсионии дар назди Академияи муҳандисӣ ва Пажӯҳишгоҳи мошиншиносии Академияи миллии илмҳои Ҷумҳурии Қирғизистон ва соли 2009 рисолаи докториро дар мавзӯи «Таҳлили кинематикӣ ва динамикии механизмҳои чаҳорбанди фишангдор дар алоқаи чандири олатҳои кории мошинҳои дӯзандагӣ» дар Шӯрои диссертатсионии назди Пажӯҳишгоҳи мошиншиносии Академияи миллии илмҳои Ҷумҳурии Қирғизистон дар шаҳри Бишкек бомуваффақият ҳимоя кардааст. Соли 2010 муовини директор оид ба илм ва инноватсияи Донишкадаи политехникии Донишгоҳи техникии Тоҷикистон ба номи академик М.Осимӣ дар ш. Хуҷанд таъин гардид. Мансурова Д.С. нахустин зани тоҷик аст, ки ба унвони баланди доктори илмҳои техникӣ соҳиб гашта, шогирдони худро дар роҳи азхуд кардани илмҳои техникӣ ҳидоят менамояд. Маҳз бо шарофати ӯ ҳамкорӣ ва робитаи илмии донишгоҳҳо ва муассисаҳои илмии Ҷумҳурии Тоҷикистон бо Ҷумҳурии Қирғизистон мустаҳкам гардида, чандин аспирантон ва унвонҷӯён бо роҳбарӣ, дастгирӣ ва кӯмаки бевоситаи ӯ рисолаҳои худро ҳимоя намудаанд. Пас аз ба вазифаи муовини директор оид ба илм ва инноватсия таъин гардидани Мансурова Д.С. дар самти корҳои илмӣ-тадқиқотӣ ва тайёр намудани мутахассисони соҳибунвони илмӣ-омӯзгорӣ тағйироти куллӣ ба амал омада, зиёда аз бист нафар устодони ҷавони донишкада рисолаҳои номзадии худро бомуваффақият ҳимоя намуданд. Бо ташаббус ва саъю кӯшиши ӯ дар Донишкадаи политехникии Донишгоҳи техникии Тоҷикистон ба номи академик М. Осимӣ дар шаҳри Хуҷанд аспирантура таъсис дода шуд, ки ин барои тарбияи мутахассисони дараҷа ва унвони илмидошта имконияти амалӣ фароҳам меорад. Мансурова Д.С. маҳорат ва малакаи баланди касбӣ дошта, дар қалби садҳо шогирдони худ тавонист, ки муҳаббат, шавқу завқи беандозаро нисбат ба касби душвори муҳандисӣ - технологӣ, фанҳои дақиқ бедор намояд. Мансурова Д.С. оиладор, соҳиби 3 нафар фарзанд. Моҳи ноябри соли 2014 ӯ директори Донишкадаи политехникии Донишгоҳи техникии Тоҷикистон ба номи академик М.Осимӣ дар ш. Хуҷанд таъин гардид.

1 марти соли 2015 ҳамчун вакил ба Маҷлиси намояндагони Маҷлиси Олии Ҷумҳурии Тоҷикистон аз ҳавзаи ягонаи умумиҷумҳуриявӣ аз ҳисоби аъзои Ҳизби Халқии Демократии Тоҷикистон интихоб шудааст.[2]

Фаъолияти илмӣ[вироиш]

Дар давоми фаъолияти меҳнатиаш ӯ зиёда аз 140 корҳои илмӣ чоп кардааст. Аз он ҷумла: 2 монография, 12 ихтироот, 98 мақола, 20 маърӯзаи мухтасар ва 9 дастури методиро ба толибилмон пешкаш намудааст. Маърӯзаю мақолаҳои ӯ дар маҷаллаҳои хориҷию ҷумҳуриявӣ чоп шудаанд.

Мукофот ва ҷоизаҳо[вироиш]

  • Аълочии маорифи Тоҷикистон (2010)
  • Дорандаи Ҷоизаи Академияи илмҳои Ҷумҳурии Тоҷикистон ба номи С. Умаров
  • Медали нуқраи симпозиуми байналмилалии занони ихтироъкор, шаҳри Сеули Кореяи Ҷанубӣ (2013)
  • Сазовори Сипосномаҳо ва Ифтихорномаҳои Мақомоти иҷроияи ҳокимияти давлатии вилояти Суғд ва шаҳри Хуҷанд мебошад.[3]

Нигаред низ[вироиш]

Сарчашма[вироиш]

  1. МАНСУРОВА ДИЛРАБО САЙДУЛЛОЕВНА
  2. Номзадҳо ба вакилӣ ба Маҷлиси намояндагони Маҷлиси Олии Ҷумҳурии Тоҷикистон аз ҳавзаи ягонаи умумиҷумҳуриявӣ аз ҳисоби аъзои Ҳизби Халқии Демократии Тоҷикистон
  3. Сомонаи донишкада