Сайфиддин Назарзода

Мавод аз Википедиа — донишномаи озод
Jump to navigation Jump to search
Сайфиддин Назарзода
Санаи таваллуд:

3 ноябри соли 1956

Зодгоҳ:

д. Танобчии ноҳияи Темурмалик

Фазои илмӣ:

олим

Сайфиддин Назарзода – олим, доктори илмҳои филологӣ, профессор.

Зиндагинома[вироиш]

Сайфиддин Назарзода 3 ноябри соли 1956 дар деҳаи Танобчии ноҳияи Совети (ҳоло Темурмалик) вилояти Хатлони Ҷумҳурии Тоҷикистон ба дунё омадааст. Баъди хатми Донишгоҳи давлатии Тоҷикистон соли 1980 - 1984 дар сафи Қувваҳои Мусаллаҳи ИҶШС адои хидмат намудааст;

  • 1984 -1985 - сарлаборанти кафедраи филологияи Эрони факултаи забонҳои шарқи Донишгоҳи миллии Тоҷикистон;
  • 1985 - 1990 - муҳаррири сарредаксияи гуфторҳои хориҷии Кумитаи давлатии телевизион ва радиои Тоҷикистон;
  • 1990 - 1992 - корманди калони илмӣ ва Котиби илмии Кумитаи ҷумҳурии истилоҳоти назди Академияи илмҳои Ҷумҳурии Тоҷикистон;
  • 1992 - 1993 - директори барномаҳои радиои Кумитаи давлатии телевизион ва радиои Тоҷикистон;
  • 1993 - 2000 муовини раиси Кумитаи ҷумҳурии истилоҳоти назди АИ ҶТ;
  • 2000 – 2003 - иҷрокунандаи вазифаи Раиси Кумита ва аз соли 2003 то моҳи октябри соли 2004 дар вазифаи муовини раиси Кумита ҷумҳурии истилоҳоти назди Раёсати АИ ҶТ кор кардааст;
  • 2004 – 2006 - Раиси Кумитаи ҷумҳурии истилоҳоти назди АИ ҶТ;
  • 2006 -2011 - Директори Институти забон ва адабиёти ба номи Рӯдакӣ АИ ҶТ;
  • 2011- 2014 - декани факултети забонҳои Осиё ва Аврупои Донишгоҳи миллии Тоҷикистон;
  • Аз 15-уми декабри соли 2014 бо амри Президенти Ҷумҳурии Тоҷикистон Эмомалӣ Раҳмон директори Китобхонаи миллии Тоҷикистон таъин ва соли 2017 аз ин мансаб озод шуд .

С. Назарзода вакили маҷлиси ноҳияи Шоҳмансур ва узви комиҷроияи Ҳизби Халқии Демократии Тоҷикистон дар ноҳияи Шоҳмансур буд.

Эҷодиёт[вироиш]

С. Назарзода дар давоми фаъолияташ дар Кумитаи истилоҳот ва Институти забон ва адабиёт китобҳои зеринро таълиф намудааст:

- Фарҳанги мухтасари истилоҳоти коргузорӣ. - Душанбе, «Симурғ», 1993, 120 саҳ.

- Асноди додраси тафтишоти пешакӣ/ мураттибон М. Аслам, С. Назарзода, Ҳ. Қаҳҳор, муҳарири масъул М.Ҳ. Султон. - Душанбе,1994, 224 саҳ.

- Луғати истилоҳоти иқтисолӣ (русӣ-тоҷикӣ)/ таълифи С.Ҳабибов ва дигарон. Таҳрири С.Назарзода ва М. Ҳ. Султон - Душанбе 1999, 260 саҳ.

- Луғати мухтасари русӣ-тоҷикии истилоҳоти гумрук./ мураттибон Аҳмадҷон Сияров ва Абдурасул Шарипов, муҳаррири масъул С.Назарзода. - Душанбе 1999, 220 саҳ.

- Луғати русӣ ба тоҷикии истилоҳоти ҳарбӣ./ мураттибон П.Нурбахш ва дигарон, таҳрири С. Назарзода ва М. Ҳ. Султон. - Душанбе, 2003, 780 саҳ.

- Фарҳанги истилоҳоти иҷтимоӣ ва сиёсӣ/Мураттиб С. Назарзода. - Душанбе 2006, 220 саҳ.

- Фарҳанги тафсирии забони тоҷикӣ, дар ду ҷилд./ мураттибон Назарзода С. ва дигарон. - Душанбе, чопи аввал 2008 ва чопи дувум 2010.

- Фарҳанги мукаммали забони тоҷикӣ./ мураттибон С. Назарзода ва дигарон, ҷилди аввал, ҳарфи «А». - Душанбе, 2011 С. Назарзода соли 2004 дар мавзуи «Истилоҳоти иҷтимоӣ ва сиёсии забон тоҷикӣ: таърих, гароиш ва дурнамо» рисолаи докторӣ навишта онро бо муваффақият ҳимоя намуд. С. Назарзода ба ғайр аз корҳои илмиву амалӣ, барномаҳои илмиву таҳқиқотии хешро низ фаъолона анҷом медиҳад. Натиҷаи ин гуна фаъолиятҳо таҳияи асарҳои илмии «Аҷоиб-ул-махлуқот» ва вожашиносии таърихии форсӣ-тоҷикӣ», 1999, (210 саҳ), маҷмуаи «Афғонистони имрӯз» ( ба забони руси), 1988. (қисми қувваҳои мусаллаҳ) «Забон ва истилоҳот» (Андешаҳо дар атрофи забони тоҷикӣ ва ташаккули истилоҳот)-Душанбе 2003 (148с.) «Лингвистическое изучение классических письменных памятников» (Пажӯҳиши забонии осори хаттии классикӣ), 2004 (333с.), «Ташаккули истилоҳоти иҷтимоӣ – сиёсии забони тоҷикӣ дар садаи ХХ», 2004 (303с.) «Забон ва ваҳдати миллӣ» 2007, 120 саҳ. ва дигар мақолаҳо дар рӯзномаву маҷаллаҳои ҷумҳурӣ ва кишварҳои хориҷӣ ва ширкат дар симпозиуми конференсияҳои илмӣ мебошад. Аз ҷумла, таи ин муддат аз тарафи ӯ бештар аз 170 мақола ва асарҳои илмӣ навишта шудааст.

Дар Институти забон ва адабиёт ба ғайр аз роҳбари умумӣ ва фаъолияти созмондиҳии илмӣ ӯ роҳбари мавзуи илмии «Фарҳанги русӣ-тоҷикӣ» ва роҳбари таҳия «Фарҳанги тафсири забони тоҷик» (дар ду ҷилд) буда, аз соли 2009 роҳбари таҳияи «Фарҳанги мукаммали забони тоҷикӣ (дар 6 ҷилд) ва «Фарҳанги имлои забони тоҷикӣ» буд. Таҳияи «Фарҳанги тафсири забони тоҷикӣ» (тартибдиҳанда ва раиси ҳайати таҳририя) соли 2008 ба анҷом расид ва ду ҷилд дар остонаи ҷашни Истиқлол, Соли бузургдошти забони тоҷикӣ ва 1150- солагии устод Рӯдакӣ чоп гардид.

С. Назарзода дар тарбияи кадрҳои илмӣ низ саҳми арзанда дошта, 13 нафар аспиранту унвонҷуй таҳти роҳбарии ӯ рисолаҳои илмии худро анҷом дода, ҳимоя кардаанд, ки ду нафари онҳо рисолаи докторӣ дифоъ кардаанд.

Мукофот ва ҷоизаҳо[вироиш]

  • Медали «Барои хидмати ҷангӣ» Укази Шӯрои Олии СССР аз 22-сентябри соли 1982;
  • Медали «70-солагии Қувваҳои Мусаллаҳи СССР»;
  • Медали «Ба сарбози интернатсионалист аз халқи қадрдони Афғонистон» Фармони Президенти Ҷумҳурии Афғонистон аз 15-маи соли 1988;
  • Ифтиорномаи фахрии Президиуми Шӯрои Олии СССР аз 28-декабри соли 1988;
  • Ифтихорномаи фахрии Вазорати Мудофиаи ҶТ, феврали соли 2003;
  • Барандаи ҷоизаи ба номи Осимии Академияи илмҳои Ҷумҳурии Тоҷикистон дар бахши илмҳои ҷамъиятшиносӣ, соли 2009.[1]

Сарчашма[вироиш]

  1. [ http://kmt.tj/?category=2&article_id=2 Роҳбарияти Китобхонаи мллии Тоҷикистон]