Ғассон ибни Аббод

Ғассон ибни Аббод

Ғассон Ибни Аббод (форсӣ: غسّان ابن عبّاد‎) — волии Хуросон (818—821), яке аз сарлашкарони халифа Маъмун (ҳукм­ро­нӣ 813—833).

Зиндагинома

Соли 817 дар ҷанг бо ҷонибдорони Амин асир афтода, пас аз раҳоӣ душманони Иброҳим ибни Маҳдиро саркӯб намуд ва дар аҳди Иброҳим муддати кӯтоҳ волии Куфа буд. Соли 818 халифа Маъмун Раҷо ибни Аби­заҳ­ҳокро бо сабаби ноуҳдабароияш аз мансаби волии Хуросон озод намуд ва Ғассон ибни Аббодро ба ҷойи ӯ таъ­йин кард. Ба қав­ли Наршахӣ ва Гардезӣ, Ғассон ибни Аббод замони волии Хуросон буданаш «Лайс ибни Саъдро аз Самар­қанд маъзул карда, Нӯҳ ибни Асадро ҳоким таъйин кард». Соли 821 бо ташаб­буси вазири Маъмун — Аҳмад ибни Абихолид Ғассон ибни Аббод аз ва­зифаи волии Хуросон озод ва ба ҷойи ӯ Тоҳир ибни Ҳу­сайн волии Хуросон таъйин карда шуд. Ғассон ибни Аббод муддате дар дарбори халифа монд. Солҳои 828-29 ба сабаби сар­печӣ кар­дани волии Синд аз итоати дарбори хилофати Бағдод Ғассон ибни Аббод бо супориши Маъмун ба он ҷо фиристода шуд ва во­лии онро ба Бағдод равон карда, Мусо ибни Яҳёро ба ман­саби волигӣ нишонд (ба қавли Табарӣ Ғассон ибни Аббод солҳои 828-32 волии Синд буд). Пас аз вафоти Маъмун халифаи нав Муътасим Ғассон ибни Аббодро во­лии ал-Ҷазира, Қиннасрин ва ал-Авосим таъйин кард.

Адабиёт

• Ғассон ибни Аббод / Ғ. Ғоибов // Ғ — Дироя. — Д. : СИЭМТ, 2016. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 5). — ISBN 978-99947-33-67-5.