Гулбастпартоӣ

Мавод аз Википедиа — донишномаи озод
Jump to navigation Jump to search

Гулбаст - матои дастии пахтагин ва сернақш аст. Дар минтақаи Кӯлоб васеъ истифода мешавад. Дар рӯи матои пахтагини сафед, яъне сон, сони ғуломҷонӣ тайёр карда мешавад. Ҳангоми интихоби матоъ бояд зирак буд, зеро ки агар сони интихобшуда бо риштаҳои абрешимӣ омехта бошад, дар рӯи он гулҳо дуруст чаконда намешаванд. Яъне, гулбастро дар рӯйи он омода кардан имконнопазир аст. Дар коркарди гулбаст асосан аз рангҳои одӣ, ки миёни аҳолӣ бо номи ранги қавволӣ маъмул аст, истифода мебаранд. Матои гулбастро асосан бо рангҳои зард, сабз ва сурхи ҷигарӣ дидан мумкин аст. Аз қадим гулбаст бо ранги сурхи ҷигарӣ тайёр карда мешуд. Аммо аз асри ХХ сар карда ҳунармандон барои диққати мардумро ҷалб кардан дар омода намудани гулбаст аз рангҳои зард ва сабз истифода мекардагӣ шуданд. Рангҳои гулбастро ҳунармандон чунин талқин медиҳанд: ранги зард - рамзи рӯшноӣ; ранги сабз - сарсабзӣ, камоли умр; ранги сурхи ҷигарӣ - рамзи мубориза. Дар рӯи матоъ гулҳои моҳтоб, офтоб, каҷак, шохча, бодомак, тӯморча чаконида мешаванд.

Тарзи омода кардани Гулбаст[вироиш]

Барои гулбасти зард мо дар нӯги чӯб каме докаро печонида, онро дар ранги зард тар намуда, дар рӯи сони сафед бо тарзи равиши гул мечаконем. Сипас, ранги чаконида ё гули чаконидаро бо ресмонҳои пахтагини сафед мебандем. Ҳар як чакидаро алоҳида бояд баст ва ресмон бояд ҳатман пахтагин бошад, ресмонҳои абрешимӣ истифода намешаванд. Баъде ки гулҳои чаконида баста шуданд, дар зери дег оташ гиронида, дар он рангобаи зардро меҷӯшонем ва гулбасти нимтайёрро ба он меандозем. Матоъ дар дохили дег 15 дақиқа меҷӯшад. Баъд онро аз оби ҷӯшида гирифта, бо оби хунук обгардон мекунем ва дар баландии офтобрас меовезем. Баъди хушк шудани матоъ гулҳои бастаро кушода, онҳоро бо рангҳои сурхи ҷигарӣ, гулобӣ ё сабз оро медиҳем. Баъди ороиш гулҳои рӯи матоъ маълум мегарданд.[1]

Нигаред[вироиш]

Пайвандҳои беруна[вироиш]

  1. Гулбастпартоӣ