Муҳаммадюсуф Имомзода

Мавод аз Википедиа — донишномаи озод
(Тағйири масир аз Муҳаммадюсуф Имомов)
Ҷаҳиш ба: новбари, Ҷустуҷӯи
Муҳаммадюсуф Имомзода
Имомзода Муҳаммадюсуф Саидалӣ
Муҳаммадюсуф Имомзода.jpg
Санаи таваллуд:

28 апрел 1959(1959-04-28) (58 сол)

Зодгоҳ:

шаҳраки Совет, ноҳияи Совет, ҶШС Тоҷикистон

Мамлакат:

 Тоҷикистон

Фазои илмӣ:

филология

Ҷойҳои кор:

Донишгоҳи славянии Россияву Тоҷикистон (2004-2012)
Донишгоҳи миллии Тоҷикистон (аз 2012)

Дараҷаи илмӣ:

доктори илмҳои филология

Унвонҳои илмӣ:

профессор

Алма-матер:

Донишгоҳи давлатии Тоҷикистон (1981)

Мукофоту ҷоизаҳо:
Ордени "Дӯстӣ" (2011)
«Ифтихорнома»-и Комитети Иҷроияи ИДМ (2011)
«Ифтихорнома»-и Шӯрои ҳамкориҳои соҳаи маориф дар кишварҳои ИДМ
“Ходими хизматнишондодаи таҳсилоти олии Федератсияи Россия”

Муҳаммадюсуф Имомзода (Имомзода Муҳаммадюсуф Саидалӣ; 28 апрели 1959, шаҳраки Совет, ноҳияи Совет, ҶШС Тоҷикистон[1] ) — олим, доктори илмҳои филологӣ, профессор, узви пайвастаи АИ Ҷумҳурии Тоҷикистон (2014).[2] Аълочии маорифи Ҷумҳурии Тоҷикистон, узви пайвастаи Академияи илмҳои иҷтимоӣ ва педагогии Федератсияи Русия, узви Иттифоқи нависандагони Тоҷикистон, дорандаи ҷоизаи байналмилалии ба номи Суқрот (Оксфорд, Англия).

Зиндагинома[вироиш]

Маҳмаисуф Сайдалиевич Имомов 28 апрели соли 1959 таваллуд ёфта, соли 1981 факултаи филологияи тоҷики Донишгоҳи миллии Тоҷикистонро аз рӯи ихтисоси забон ва адабиёти тоҷик хатм кардааст. Фаъолияти меҳнатии худро аз лаборанти калони Пажуҳишгоҳи забон ва адабиёти ба номи А.Рӯдакии Академияи илмҳои Тоҷикистон (солҳои 1981-1984) оғоз карда, сипас солҳои 1984-1985 муҳаққиқ-коромӯзи Институти адабиёти ҷаҳони ба номи М. Горкии АИ Иттиҳоди Шӯравӣ мегардад. Солҳои 1985-1991 М.С. Имомов аввал аспирант, сипас дар вазифаи ходими илмии Пажӯҳишгоҳи забон ва адабиёти Академияи илмҳои Ҷумҳурии Тоҷикистон кор кардааст. Соли 1990 ӯ дар мавзӯи «Санъати портретсозӣ дар насри Садриддин Айнӣ» рисолаи номзадии худро дифоъ намуд.

Профессор М.С. Имомов аз соли 1991 баъди хатми аспирантура дар Донишгоҳи миллӣ, то соли 2004 дар вазифаҳои муаллим, муовини декани факултети филология, дотсенти кафедраи назария ва адабиёти навини форсии тоҷикӣ ва декани факултети филология кор кардааст. Фаъолияти ташкилотчигӣ ва илмӣ-омӯзгории профессор М.С. Имомовро ба назар гирифта Ҳукумати Ҷумҳурии Тоҷикистон моҳи декабри соли 2004 ӯро ба вазифаи ректори Донишгоҳи славянии Тоҷикистон-Русия ва дар соли 2012 роҳбари бузургтарин донишгоҳи кишвар – Донишгоҳи миллии Тоҷикистон таъин намуданд. Дар ин муддат тамоми ҳуҷҷатҳои меъёрии ҳуқуқии донишгоҳии танзимкунандаи ҷараёни таълим, тарбия, фаъолияти илмӣ, робитаҳои байналмиллалӣ ва маъмурию хоҷагидорӣ аз ҷониби мутахассисони соҳаҳо омода гашта, дар ҷаласаҳои Шӯрои олимон баррасӣ ва бо фармонҳои ректори донишгоҳ тасдиқ ва мавриди иҷро қарор дода шуданд. Ҳангоми роҳбарии худ профессор Имомов М.С. дар Донишгоҳи славянии Русияву Тоҷикистон барои густариши равобити фарҳангии Тоҷикистону Русия ва ҳамчунин самарабахшии сифати таълими забони русӣ дар Тоҷикистон ва берун аз он, ҳамчунин дар Федератсияи Русия саҳми бориз гузоштааст. Дар ин даврон дар назди Донишгоҳи славянии Россияву Тоҷикистон Бунёди “Русский мир” боз гардида, Форуми хатмкардагони донишгоҳҳои Федератсияи Русия бо унвони “Илм ва маориф” ва бо ширкати зиёиёну олимони Иттиҳоди давлатҳои муштаракулманофеъ гузаронида шуд. Дар доираи барномаи мақсадноки федеролӣ таҳти унвони “Русский язык” дар ҳамкорӣ бо Донишгоҳи давлатии Москва ба номи М.В. Ломоносов ва Маркази таҳсилоти байналмилалӣ дар Тоҷикистон Рӯзҳои забони русӣ гузаронида шуд. Дар даврони сарварии профессор Имомов М.С. се маркази бузург, ки бо масоили гуногуни кишварҳои ИДМ машғул мешаванд бо унвони “Маркази пажӯҳишҳои геополитикӣ”, Маркази “Шарқ - Ғарб” ва “Маркази Забони тоҷикӣ” дар Донишгоҳи давлатии забоншиносии Москва таъсис дода шуд. Аз соли 2012 М.С. Имомов ректори Донишгоҳи миллии Тоҷикистон мебошад.

Осори илмӣ[вироиш]

Профессор М. С. Имомов мунтазам ба корҳои илмию таҳқиқотӣ ва методӣ низ машғул гардида, соли 2002 дар мавзӯи «Тафаккури бадеӣ ва поэтикаи насри Садриддин Айнӣ» рисолаи докториро бо муваффакият дифоъ менамояд. М.С. Имомов муаллифи зиёда аз 200 корҳои илмию методӣ дар масъалаҳои актуалии адабиёти тоҷик мебошад.

Осори илмию методии профессор Имомов М.С. аз қабили «Масъалаҳои забон ва адабиёти тоҷик» (1998), «Маънавият ва нақши зоҳир» (2000), «Ҷаҳонбинӣ ва тафаккури бадеии Садриддин Айнӣ» (2001) ба масъалаҳои мубрами улуми филологӣ бахшида шудаанд.

Адабиётшиноси маъруф, мунаққиди адабиёт, профессор М.С. Имомов дар адабиётшиносии муосир мақому мартабаи хоса дорад ва саҳми ӯ дар рушди улуми филологӣ беназир аст. Пажӯҳишҳои илмию назарии ӯ масоили мубрами таърих ва назарияи адабиёт ва ҳамчунин нақди адабӣ, адабиётшиносии киёсӣ, назарияи тарҷума ва дигар ҷанбаҳои назму насри бадеиро фаро мегирад. Бо ташаббуси ин муҳаққиқ дар адабиётшиносии муосири тоҷик самти нави илмии марбут ба масоили поэтикаи наср дар асоси таҳқиқ ва пажӯҳиши осори насрии адабиёти муосир бунёнгузорӣ шуд. Яке аз мутахассисони пешбари соҳаи адабиёти тоҷики қарни ХХ. Муаллифи таҳқиқоти сершумори илмӣ роҷеъ ба ҳаёту эҷодиёти Садриддин Айнӣ ва дигар масъалаҳои таърих ва назарияи адабиёти классикӣ ва муосири тоҷик; муаллифи монография ва маҷмӯаи мақолоти илмии «Ҷаҳонбинӣ ва тафаккури бадеии Садриддин Айнӣ», «Маънавият ва нақши зоҳир», «Сужет ва тасвир дар насри Садриддин Айнӣ», «Хирмани андеша» ва диг. Профессор Имомов М.С. яке аз бунёдгузорон маҷаллаи илмии “Ҷустуҷӯҳои адабӣ” буда, дар саҳифаҳои он мақолаҳои беҳтарину арзишманди илмии олимони варзидаи адабиётшиносиро ба нашр расонидааст ва дар баробари ин мақолаҳои басо арзишманди худро дастраси олимону толибилмони соҳаи фарҳангу адабиёт намудааст.

Профессор М.С. Имомов дар тайёр намудани мутахассисони ҷавон пайваста саҳми арзанда мегузорад ва солҳои тӯлонӣ мавсуф ба ҳайси раиси Шӯрои дифои рисолаҳои илми фаъолият намудааст. Таҳти сарварии ӯ 5 нафар унвонҷӯён рисолаҳои докторӣ ва 13 нафар рисолаҳои номзадии худро бомуваффақият ҳимоя намудаанд.

Мукофотҳо[вироиш]

М.С. Имомов профессори фахрии Донишгоҳи давлатии забоншиносии Москва ва Донишгоҳи омӯзгории Синзяни Ҷумҳурии Халқии Хитой мебошад.

Барои саҳми беандоза дар омода намудани мутахассисони варзидаи соҳаи илму маориф профессор Имомов М.С. узви пайвастаи Академияи илмҳои Ҷумҳурии Тоҷикистон, академики Академияи илмҳои педагогии Федератсияи Россия интихоб шудааст.

Барои хизматҳои шоён ва арзанда дар назди халқу ватан, саҳми беандоза дар рушди дӯстиву ҳамкориҳои сатҳи байналмиллалӣ дар миёни кишварҳои гуногун профессор Имомов М.С. бо ордени “Дӯстӣ” (2011), Ифтихорномаи Комитети Иҷроияи ИДМ (2011), Ифтихорномаи Шӯрои ҳамкориҳои соҳаи маориф дар кишварҳои ИДМ сарфароз гардонида шудааст. Дар соли 2012 профессор Имомов М.С. ба дараҷаи “Ходими хизматнишондодаи таҳсилоти олии Федератсияи Россия” сазовор гардид.

Эзоҳ[вироиш]

Адабиёт[вироиш]

Сарчашма[вироиш]