Файзулло Бобоев

Мавод аз Википедиа — донишномаи озод
Jump to navigation Jump to search
Файзулло Бобоев
Файзулло Баротович Бобоев
Fayzullo Boboev.jpg
Файзулло Баротович Бобоев
Санаи таваллуд:

10 феврал 1962(1962-02-10) (57 сол)

Зодгоҳ:

ноҳияи Ҳисор

Фазои илмӣ:

шарқшиносӣ

Ҷойҳои кор:

Пажӯҳишгоҳи шарқшиносии АИ ҶШС Тоҷикистон, Институти забон, адабиёт, шарқшиносӣ ва мероси хаттии ба номи Рӯдакӣ Академияи илмҳои Тоҷикистон, Муассисаи давлатии Маркази исломшиносӣ дар назди Президенти Ҷумҳурии Тоҷикистон

Дараҷаи илмӣ:

номзади илм

Унвонҳои илмӣ:

дотсент

Алма-матер:

Донишгоҳи миллии Тоҷикистон

Ҷоизаҳо:

ордени «Шарафи ҳарбӣ»-и Сурия

Файзулло Бобоев - олим, шарқшинос, тарҷумон, номзади илмҳои филологӣ.

Зиндагинома[вироиш]

Файзулло Бобоев соли 1979 баъди хатми мактаби миёна ба факултаи забонҳои Шарқи Донишгоҳи миллии Тоҷикистон дохил шуда, ба гирифтани идрорпулии ба номи Б. Ғафуров ноил мегардад. Бобоев солҳои 1982-1983 дар Ҷумҳурии Либиё ба ҳайси тарҷумон хизмат кардааст. Баъд аз бозгаштан, ӯ соли 1985 бо дипломи аъло Донишгоҳи миллии Тоҷикистонро хатм кард. Бобоев дар ш. Красноводски Туркманистон ба сифати тарҷумони забони арабӣ фаъолияти корияшро оғоз бахшида, баъд ба ҷумҳурии Сурияи Араб фиристода шуда, дар ин ҷо ба таҳияи дастури таълимӣ-техникии «Наставление по прорыву укрепленных районов» (Дастуруламал оид ба рахна кардани минтақаҳои истеҳкомӣ) шурӯъ мекунад. Соли 1989 лаборанти калони шуъбаи омӯзиши тамаддуни Осиёи Марказӣ дар Пажӯҳишгоҳи шарқшиносии Академияи илмҳои Тоҷикистон ба кор оғоз мекунад. Минбаъд ҳамчун ходими хурди илмӣ, ходими илмӣ, ходими калони илмӣ ва ходими пешбари илмӣ дар Институти шарқшиносӣ ва мероси хаттии Академияи илмҳои Тоҷикистон машғули тадқиқоти илмӣ будааст. Соли 1995 рисолаи номзадиро дар мавзӯи «Таърихномаи Балъамӣ ҳамчун сарчашмаи адабӣ» дифоъ намуд. Аз соли 2004 то соли 2007 ба ҳайси котиби илмии Шӯъбаи илмҳои ҷамъиятшиносии раёсати АИ ҶТ кор кардааст. Солҳои 2007-2009 докторанти Институти шарқшиносӣ ва мероси хаттӣ ва солҳои 2009-2011 муовини директори ҳамин Институт оид ба илм буд. Моҳҳои феврал-апрели соли 2011 иҷрокунандаи вазифаи директори Институти забон, адабиёт, шарқшиносӣ ва мероси хаттии ба номи Рӯдакӣ Академияи илмҳои Тоҷикистон таъйин гардид. Моҳҳои апрел-сентябри ҳамин сол ба сифати ҷонишини директори Институти забон, адабиёт, шарқшиносӣ ва мероси хаттии ба номи Рӯдакӣ оид ба илм кор кардааст. Аз моҳи октябри соли 2011 то 13 феврали соли 2015 дар вазифаи ёвари президенти Академияи илмҳои Тоҷикистон ифои вазифа намудааст. Дар Пажӯҳишгоҳи шарқшиносӣ ва мероси хаттии Академияи илмҳои Тоҷикистон дар тарҷумаву таълифи якчанд китобҳои нодир ба монанди "Қуръон", "Таърихи Табарӣ" ва диг. иштирок кардааст. Файзулло Бобоев дар якчанд сипозиуму машваратҳои бонуфузи байналхалқӣ бахшида ба масъалаҳои тамадун ва фарҳанги исломӣ ҳамчун мутахассис аз Тоҷикистон даъват гардида баромадҳои илмӣ кардааст. Дар чорабиниҳои байнидавлатии Тоҷикистон бо намояндагони мамолики исломӣ ӯ ҳамчун коршинос ва тарҷумон иштирок дошт. Бо фармони Президенти ҶТ аз 13 феврали соли 2015 директори Муассисаи давлатии Маркази исломшиносӣ дар назди Президенти Ҷумҳурии Тоҷикистон таъин шудааст.[1]

Фаъолияти илмӣ[вироиш]

Тадқиқоти илмии Баротзода Ф. ба омӯзиши асари «Таърихи Табарӣ» бахшида шуда, дар ин бобат бештар аз 30 мақолаи илмӣ ва 40 мақолаи илмӣ-оммавӣ чоп намудааст. Ӯ ҳамчунин доир ба масъалаҳои омӯзиши муқоисавии адабиёти араб ва тоҷик, фарҳанги исломӣ, Қуръон ва ҳадисшиносӣ тадқиқот анҷом дода, ба тарҷумаи ду сарчашмаи асосии ислом – Қуръону ҳадис (Саҳеҳи ал-Бухорӣ) низ машғул шудааст. Ӯ бо гузоришҳои илмӣ дар бештар аз 45 конференсия ва ҳамоишҳои илмӣ ширкат ва суханронӣ кардааст. Дар таҳия, тарҷума ва омодаи чоп намудани асарҳои зерин саҳми арзанда гузоштааст.

Осор[вироиш]

  • «Таърихи Табарӣ» дар 2 ҷилд. – Теҳрон, «Замон», 2001. – 1632 с.;
  • «Саҳеҳи ал-Бухорӣ» дар 4 ҷилд. – Душанбе, «Эр-граф», 2004-2012. – 2120 с.;
  • «Қуръони карим». – Душанбе, «Ирфон», 2007. – 602 с.;
  • «Қуръони карим». – Душанбе, «Эр-граф», 2011. – 602 с.[2]

Бо ордени «Шарафи ҳарбӣ»-и Сурия мукофотонида шудааст.[3]

Манобеъ[вироиш]

  1. ФАРМОНИ ПРЕЗИДЕНТИ ҶУМҲУРИИ ТОҶИКИСТОН
  2. МАРКАЗИ ИСЛОМШИНОСӢ ДАР НАЗДИ ПРЕЗИДЕНТИ ҶУМҲУРИИ ТОҶИКИСТОН
  3. Донишномаи Ҳисор. - Душанбе: "Ирфон", 2015, - С. 170