Қурбоналӣ Бӯриев

Мавод аз Википедиа — донишномаи озод
Jump to navigation Jump to search
Қурбоналӣ Бӯриев
Қурбоналӣ Бӯриев
Санаи таваллуд:

20 ноябри соли 1964

Зодгоҳ:

ноҳияи Рӯдакӣ

Қурбоналӣ Бӯриев - олим, номзади илми таърих, дотсент, медали Хизмати Шоиста (2016), Аълочии фарҳанги Ҷумҳурии Тоҷикистон (2012), Ифтихорномаи Вазорати маориф ва илми Чумхурии Точикистон (2014) ва Аълочии маорифи Ҷумҳурии Тоҷикистон (2015).

Зиндагинома[вироиш]

Қурбоналӣ Бӯриев - 20 ноябри соли 1964 дар ноҳияи Рӯдакӣ (собиқ ноҳияи Ленин) таваллуд ёфта, баъди анҷоми мактаби миёна соли 1982 ба факултаи китобдории Донишкадаи давлатии санъати Тоҷикистон ба номи М. Турсунзода дохил шуд, аммо ба сафи Қувваҳои Мусаллаҳи ИҶШС даъват мегардад ва баъди адои он (1983-1985) ба таври гузариш таҳсилро дар Донишкадаи даватии маданияти Маскав идома дода, ин боргоҳи бонуфузи таълимиро соли 1988 ба поин меоварад. Фаъолияти меҳнатиаш ба сифати омӯзгори кафедраи библиографишиносии факултаи Китобдори Донишкадаи давлатии санъати Тоҷикистон ба номи М. Турсунзода ҳамон сол шурӯъ шуд, солҳои 1993-1997 унвонҷӯи Институти таърих, бостоншиносӣ ва мардумшиносии АИ Тоҷикистон буд, 1997-2001 ба ҳайси мудири шӯъбаи Китобхонаи давлатии бачагонаи ҷумҳуриявӣ ифои вазифа карда, 2001-2008 дар ташкилоти ғайридавлатии башардӯстонаи КАРЕ интернейшл хидмат намуд. Аз соли 18/05/2009 - 22/05/2015 директори Пажӯҳишгоҳи илмӣ-таҳқиқотии фарҳанг ва иттилоот, аз моҳи (4) июни соли 2015 директори генералии "Агентии миллии созмони байналмилалии рақамгузории стандарти китоб - Хонаи китоби Тоҷикистон"-и Вазорати фарҳанги Ҷумҳурии Тоҷикистон мебошад. Доманаи таҳқиқи номбурда фарох аст, перомуни пайдоиши иттилооти библиографӣ дар китобхонаҳои ҷумҳурӣ, фаъолияти китобдорӣ дар Тоҷикистон, сарчашмаҳои соҳаи китобдорӣ, таърихи китобу китобхонаҳо, библиографияи тоҷик дар давраи Сомониён ва ба баъд, ҳамкории Тоҷикистону Русия дар соҳаи китобдорӣ ва тарбияи кадрҳо, таърихи сарчашмашиносии форсӣ-тоҷикии библиографӣ ва ғайра матолиб ба табъ расондааст. Вале таваҷҷӯҳи асосии тадқиқотии ӯро масоили библиографияи кишоварзии миллӣ ва таърихи библиографияи тоҷик маҳтуф доштааст.

Фаъолияти илмӣ[вироиш]

Муҳаққиқ баробари библиографияи соҳаи кишоварзӣ инчунин таърихи соҳа ва сарчашмаҳои мавҷудаи онро мавриди омӯзиш қарор дода, матолиби фаровон дар ин маврид ба чоп расондааст. Рисолаи илмӣ- таҳқиқотиаш «Заминаҳои пайдоиш ва рушди библиографияи кишоварзӣ» таҳти назари академик Нӯъмон Неъматов соли 2000 ба табъ расид. Муаллиф масоили пайдоиши аломатҳои тасвири библиографиро дар осори ниёгон таҳқиқ намуда, оид ба истифодаи иқтибос ва истинодҳо дар рисолаҳои кишоварзӣ, феҳристҳои китобхона, нишондиҳандаҳои алоҳида ва инъикоси адабиёти кишоварзӣ дар онҳо маълумоти зиёд гирдоварӣ намуда, хулоса баровардааст, ки библиографияи кишоварзӣ то пайдоиши назарияи он васеъ истифода шудааст. Рисолаи дигараш «Таърихи кишоварзии Тоҷикистон дар асоси сарчашмаҳои хаттӣ» (соли 2002) дар асоси маводи таърихии халқи тоҷик, дастхатҳои соҳавӣ ва асарҳои илмии олимони таърихшинос ва кишоварз офарида шуда, дар он таърихи соҳаи кишоварзӣ аз замони пайдоиш то кунун инъикос меёбад. Дар рисолаи «Библиография дар аҳди Сомониён» (соли 1999) таърихи мухтасари мавҷудияти библиографияи он аҳд бо таҳлили сарчашмаҳои илмӣ, адабӣ, таърихӣ, фалсафӣ, тиббӣ, шарҳиҳолӣ, библиографии мансуби замон бо далелҳои мушаххас баррасӣ гардидааст, оид ба қадамҳои аввалини табақабандии илм ва ҳамзамон шаклу намудҳои гуногуни мавҷудияти дастурҳои библиографии аҳди Сомониён хулоса ва пешниҳодҳои ҷолиб пешкаши хонанда гардидааст. Вай ба сифати китобшинос, таърихнигор ва фарҳангшинос низ корҳои шоён ба анҷом расондааст, перомуни ҳаёту фаъолияти як идда китобшиносони маъруфи ҷумҳурӣ очерку лавҳа ва мақолаҳо навиштааст, дар мавриди ҳамкориҳои фарҳангии Тоҷикистон бо Русия, Қазоқистон, Узбекистон силсилаи мақолаҳо аз даст баровардааст. Қурбоналӣ Бӯриев мураттиби «Фаъолияти китобдорӣ дар Тоҷикистон: Маҷмӯаи мақолаҳо (Китобҳои I, II, III, IV, V, VI, VI)», Душанбе, 2010 - 2013 (дар ҳамкорӣ бо С. Шосаидов), Тақвими арбобони барҷастаи фарҳангу санъати Ҷумҳурии Тоҷикистон (солҳои 2010; 2011-2012; 2013-2014) (дар ҳамкорӣ бо Ҷӯрабой Раҷабов), сармуҳаррири ду ҷилди "Осори Пажӯҳишгоҳ" (солҳои 2014; 2015)(дар ҳамкорӣ бо Мурод Муродов), сармуҳаррири маҷаллаи «Паёмномаи фарҳанг» аз №12 то №30(солҳои 2009; 2015)(дар ҳамкорӣ бо Мурод Муродов ва дигарон), муҳаррири зиёда аз 30 дастурҳои таълимию китобҳои дарсӣ, сенарияҳои ҷашнӣ ва феҳристи адабиёт мебошад. Ӯ иштирокдори бисёр симпозиум, форум, конференсия, семинар ва ҳамоишҳои илмию амалии байналмилалӣ ва ҷумҳуриявӣ дар мавриди роҳҳои рушди фарҳанги миллӣ, беҳтарсозии хизматрасонии иттилоотӣ ба ҷомеа, пешрафти илми китобдории тоҷик, роҳбурдҳои тоза дар мудирияти иноватсионии фаъолиятҳои иҷтимоӣ-фарҳангӣ, ҳолати иҷтимоӣ-фарҳангии анъанаҳо ва ғайра буда, дар маҳфилу мизҳои мудаввари сатҳи ҷумҳуриявӣ перомуни китобдории миллӣ ва умуман пешбурди фарҳанг гузоришҳои пурмӯҳтаво ироа доштааст. Ба ҳайси сармуҳаррири маҷаллаи «Паёмномаи фарҳанг» дар тарғибу ташвиқи маданияти тоҷик, мушкилоти пешорӯ ва роҳҳои ҳалли онҳо ва дигар масъалаҳои марбута саҳми муносиб мегузорад. Ҳангоми шомилгардонии «Паёмномаи фарҳанг» ба бойгонии Китобхонаи электронии Россия, РИНЦ, аз соли 2012, доираи хонандагони он борҳо афзуда, имрӯз матни мухтасари мақолаҳои «Паёмномаи фарҳанг»-ро дар тамоми дунё бо се забон истифода мебаранд. Қобили таваҷҷуҳ аст, ки бо роҳбарии ӯ дар Пажӯҳишгоҳи илмӣ-тадқиқотии фарҳанг ва иттилоот намунаҳои мероси фарҳангии миллӣ "Чакан" ва "Оши палов" ба Рӯйихати репрезентативии мероси фарҳангии ЮНЕСКО пешниҳод гардид ва бори нахуст "Феҳристи мукаммали мероси фарҳанги ғайримоддии тоҷик" дар ҳудуди 286 номгӯй таҳия гашт. Ду филми ҳуҷҷати ва зиёда аз 10000 маълумотҳои библиографӣ ва фактографӣ омода ва дар бойгонии электронии Пажӯҳишгоҳи илмӣ-тадқиқотии фарҳанг ва иттилоот нигоҳ дошта мешавад. Умуман, теъдоди таълифоташ аз 200 мегузарад. Имруз у дар вазифаи директори генералии Агентии миллии Созмони байналмилалии ракамгузории стандарти китоб - Хонаи китоби Точикистон фаъолияти пурсамар дорад. [1]

Мукофот[вироиш]

Медали Хизмати Шоиста (2016)

  • «Аълочии фарҳанги Ҷумҳурии Тоҷикистон» (2012),

Ифтихорномаи маориф ва илми Чумхурии Точикистон (2014),

  • «Аълочии маорифи ва илми Ҷумҳурии Тоҷикистон» (2015),

Намунаи осор[вироиш]

  • Библиография дар аҳди Сомониён [Матн]. - Душанбе, 1999. - 27 с.
  • Библиографияи кишоварзии тоҷик [Матн]: Мавод барои омӯзиши фан. - Душанбе, 2011.-160 с.
  • Таърихи библиографияи кишоварзӣ [Матн]: Монография. - Душанбе, 2011. - 176 с.
  • Возникновение и развитие сельскохозяйственной библиографии [Текст]: Монография. - Душанбе, 2000. -104 с.
  • История возникновения и развития сельскохозяйственной библиографии [Текст]. - Душанбе, 2010.-128 с.
  • История сельского хозяйства Таджикистана (на основе рукописного наследия) [Текст]. - Душанбе, 2002. - 167 с.
  • История таджикской библиографии [Текст]. - Душанбе: Ирфон, 2014. - 176 с.
  • Таърихи библиографияи точик [Текст]. - Душанбе: Ирфон, 2017. - 260 с.

Адабиёт доир ба Бӯриев[вироиш]

  • Каримзода Б. Олимӣ ҷӯяндагӣ [Матн] // Китоб. - 2000. - №3.- декабр.
  • Каримзода Б. Таҳқиқи фарҳангшиносии тоҷик [Матн] // Ҷавонони Тоҷикистон. - 2011. - 15сентябр.
  • Каримзода Б. Библиографияи кишоварзӣ [Матн] // Садои мардум. - 2011. - 23декабр.
  • Сулаймонӣ С. Раҳоварде дар пайроҳаи донишшиносӣ [Матн]: // Паёмномаи фарҳанг. - 2012. - №3. - С. 117 - 123.
  • Фарӽанг ва истиқлол / Таӽияи Ф.Азизӣ; Муӽаррир Гулназар. – Душанбе: Адиб, 2011. – 292 с. Роҷеъ ба Қ.Бӯриев ниг., с.91, 126-127.
  • Каримзода, Б. Библиографияи кишоварзӣ: Мулоӽизаӽо оид ба рисолаи Қ.Б. Бӯриев «Таърихи библиографияи кишоварзӣ» // Садои мардум. – 2011. – 23 декабр.
  • Раҷабов, Ҷ. Қурбоналӣ Бӯриев: Ба ифтихори 50 – солагии зодрӯзаш // Тақвими Арбобони барҷастаи фарӽангу санъати Ҷумҳурии Тоҷикистон барои солҳои 2013 – 2014 / ПИТФИ. – Душанбе: Истеъдод, 2012. – С. 123 – 128.
  • Бӯриев Қурбоналӣ Бозорович // Холов, Б., Маҳмудов, Г. Махзани маърифат. Дастури таълимӣ барои донишҷӯён. – Душанбе: Ирфон, 2014. – С. 44 – 46.
  • Бӯриев Қурбоналӣ Бозорович – директори Пажӯӽишгоӽи илмӣ – тадқиқотии фарӽанг ва иттилоот [Манобеи электронӣ]. – Низоми дастрасӣ: www.pitfi.tj
  • Бӯриев Қурбоналӣ Бозорович: Маҷмӯаи мақолаӽо ва китобномаи шарӽиӽолӣ / Мураттиб ва муаллифи пешгуфтор Ш.Комилзода; Муӽаррир Қ.Авғонов. – Душанбе: Истеъдод, 2014. – 158 с.

Манобеъ[вироиш]

  1. Тақвими ҷашн ва санаҳои муҳими Ҷумҳурии Тоҷикистон (барои соли 2014) - Душанбе: Бухоро, 2012.- 95 с.