Сироҷиддин Бандаев

Мавод аз Википедиа — донишномаи озод
Ҷаҳиш ба: новбари, Ҷустуҷӯи
Сироҷиддин Бандаев
Сироҷиддин Гадоевич Бандаев
Санаи таваллуд:

10 март 1945(1945-03-10) (72 сол)

Зодгоҳ:

ноҳияи Тавилдара , ҶШС Тоҷикистон, СССР

Мамлакат:

 Тоҷикистон Тоҷикистон

Фазои илмӣ:

кимиё

Ҷойҳои кор:

Донишкадаи давлатии омӯзгории ш. Душанбе ба номи Т. Г. Шевченко

Дараҷаи илмӣ:

доктори илм

Унвонҳои илмӣ:

профессор

Алма-матер:

Донишкадаи давлатии омӯзгории ш. Душанбе ба номи Т. Г. Шевченко

Мукофоту ҷоизаҳо:

«Корманди шоистаи Точикистон», «Медали фахрии Амрико-2003», «Аълочии маорифи Тоҷикистон», «Аълочии маорифи халқи ИҶШС», ифтихорномаву дипломҳои Вазорати маорифи ИҶШС ва Вазорати маорифи Ҷумҳурии Тоҷикистон, як қатор медалҳо.

Сироҷиддин Бандаев - олим, омӯзгор, кимиёшиноси маъруфи тоҷик, доктори илмҳои кимиё (1992), профессор (1993), узви вобастаи Академияи таҳсилоти Тоҷикистон (2005), академики Академияи илмҳои байналмилалии мактабҳои олӣ (МАН ВШ) (2000), Аълочии маорифи Тоҷикистон, Корманди шоистаи Тоҷикистон (1998), барандаи Ҷоизаи Президенти Ҷумҳурии Тоҷикистон дар соҳаи маориф (2012)

Зиндагинома[вироиш]

Сироҷиддин Гадоевич Бандаев10 марти 1945 дар деҳаи Лоҷирк, ноҳияи Тавилдара таваллуд шудааст, Солҳои 1962- 1970 дар шӯъбаи химия-биологияи факултаи ҷуғрофия ва табиатшиносии Донишкадаи давлатии омӯзгории ш. Душанбе ба номи Т. Г. Шевченко таҳсил намудааст. Солҳои 1970–1972 муаллими кафедраи химияи органикӣ ва биологии донишкадаи номбурда, 1972–1975 аспиранти Донишгоҳи давлатии ш. Москва ба номи М. В. Ломоносов, 1976–1982 муаллими калон, 1982–1989 дотсент ва мудири кафедраи химияи органикӣ ва биологии донишкадаи омӯзгории пойтахт, 1989– 1992 докторанти Донишгоҳи давлатии ш. Москва ба номи М. В. Ломоносов буд. Ҳамзамон солҳои 1979–1980 вазифаи декани факултети биология-химияи донишкадаи омӯзгории пойтахтро ба ӯҳда дошт. Солҳои 1992–1995 ҳамчун мудири кафедраи химияи органикӣ ва биологӣ, 1995–1998 муовини ректор оид ба корҳои илмӣ, 1998–2009 муовини ректори Донишгоҳи давлатии омӯзгории Тоҷикистон ба номи С. Айнӣ оид ба корҳои таълимӣ кор кардааст. Аз соли 2010 мушовири ректори донишгоҳи омӯзгорӣ мебошад. Солҳои 1971–1972 дар Донишгоҳи давлатии ш. Ленинград, 1978–1979 дар Донишгоҳи ш. Лейпсиги Олмон ихтисоси худро такмил додааст. Тӯли 40 соли фаъолияти омӯзгорияш дар таълиму тарбияи ҳазорҳо мутахассисон барои соҳаи маорифи ҷумҳурӣ саҳми арзишманди худро гузоштааст. Ҳамчун мудири кафедра ва декани факултети химия дар баланд бардоштани дараҷаи илмӣ-методии раванди таълим хизмати бузурге кардааст. Бо роҳбарии ӯ донишҷӯёни донишгоҳи омӯзгорӣ дар маҷаллаву маҷмӯаҳои илмии ватанию хориҷӣ зиёда аз 20 мақола интишор намуданд. Якчанд шогирдонаш дар озмуни умумииттифоқии корҳои илмии донишҷӯён бо дипломи КМ ВЛКСМ ва Вазорати маълумоти оливу миёнаи махсуси ИҶШС қадр карда шудааст. Барои ҷалб намудани ҷавонони лаёқатманд ба аспирантураву докторантура, ҷалб кардани омӯзгорони варзида барои таҳияи китобҳои дарсӣ (барои мактабҳои олӣ ва таҳсилоти ҳамагонӣ), такмили раванди таълим дар донишгоҳ, аз ҷумла гузаштан ба таълими бисёрзинагӣ ва амалӣ гардонидани он дар факултетҳо, муайян намудани мазмун ва мундариҷаи таълим барои ихтисосҳои омӯзгорӣ, навиштани барномаву нақшаҳои нави таълимӣ барои зинаҳои бакалавр, мутахассис ва магистр хизмати арзанда кардааст. Аз соли 2008 Мушовири ректори донишгоҳ ва профессори кафедраи химияи органикӣ ва биологии Донишгоҳи давлатии омӯзгории Тоҷикистон ба номи Садриддин Айнӣ тмебошад.

Фаъолияти илмӣ[вироиш]

Оид ба қонуниятҳои (қобилияти реаксионӣ, стереохимия ва механизм) реаксияи арилсиклопропанҳо бо намакҳои симоб (II) ва модификатсияи онҳо ба пайвастагиҳои алкиларилӣ ва гетеросиклии нимафунксионалӣ корҳои илмӣ бурдааст. Дар натиҷаи тадқиқоти бисёрсолааш усули ҳосил кардани як силсила спиртҳо ва эфирҳои мекуриронидашудаи бисёрфунксионалиро ихтироъ карда, роҳҳо ва нақшаҳои нави истифодаи синтетикии онҳоро нишон додааст. Муаллифи 2 рисола, 5 китоби дарсӣ, 6 воситаҳои таълимӣ, 5 дастури методӣ, зиёда аз 250 мақолаи илмӣ, илмию методӣ, илмию оммавӣ ва таҳиягари «Стандартҳои давлатии таҳсилоти олии касбӣ аз рӯи ихтисосҳои омӯзгорӣ» (2004) мебошад. Иштирокчии симпозиуми байналхалқии ИЮПАК ш. Москва (1986) ва ш. Коҳира (1992) буда, дар як қатор анҷуману конференсияҳои ҷумҳуриявӣ, минтақавӣ, умумиитифоқӣ ва байналмилалӣ бо мавзӯъҳои илмӣ баромад намудааст. Ӯ иштирокчии ВДНХ-и ИҶШС буда, бо медали «Биринҷӣ» сарфароз шудааст. Дар тарбияи ҳазорҳо мутахассисони баландихтисоси илми- таълимӣ саҳми арзанда дорад. Бо роҳбарии ӯ 8 нафар рисолаҳои номзадии худро дифоъ намудаанд. Солҳои тӯлонӣ аъзои Шӯрои илмию методии Вазорати мактабҳои олии ИҶШС ва Ҷумҳурии Тоҷикистон оид ба химия буд. Бо роҳбарии ӯ 10 нафар рисолаи номзадӣ тайёр намудаанд.

Осор[вироиш]

  • Реаксияи меркуронидани арил сиклопропанҳо ва истифодабарии он дар синтези пайвастагиҳои органикӣ. Қ. 1, Д., 1996, Қ. 2, Д., 1998;
  • Худназораткунӣ дар дарсҳои амалӣ аз химияи органикӣ. Қ.1, Д., 2001, Қ. 2, Д., 2002;
  • Химияи органикӣ (барои синфи 10), Д., 2006; Машғулиятҳои амалӣ аз химияи органикӣ, Д., 2010;
  • Маҷмӯи машқ ва масъалаҳо аз химияи органикӣ. Қ. 1, Д., 2005, Қ. 2, Д., 2010.

Мукофот[вироиш]

«Корманди шоистаи Точикистон», «Аълочии маорифи Тоҷикистон», «Аълочии маорифи халқи ИҶШС», ифтихорномаву дипломҳои Вазорати маорифи ИҶШС ва Вазорати маорифи Ҷумҳурии Тоҷикистон, инчунин як қатор медалҳо сарфароз карда шудааст.Шӯрои роҳбарикунандаи муҳаррирони Пажӯҳишгоҳи биографии Амрико ӯро бо «Медали фахрии Амрико-2003» қадр кардааст.[1]

Сарчашма[вироиш]

  1. Бандаев Сироҷиддин Гадоевич

Пайвандҳои беруна[вироиш]