Факултаи театр, кино ва телевизион (ДДФСТ)

Мавод аз Википедиа — донишномаи озод
Jump to navigation Jump to search
Театр, кино ва телевизион
Соли таъсисёбӣ

1967

Донишҷӯён

зиёд. 400

Театр, кино ва телевизион — яке аз факултаҳои Донишкадаи давлатии фарҳанг ва санъати Тоҷикистон ба номи Мирзо Турсунзода мебошад.

Самти фаъолияти факулта[вироиш]

Факултаи театрӣ - бадеӣ соли 1967 таъсис ёфта, моҳи августи соли 2016 ба факултаи театр, кино ва телевизион табдили ном кард. Факултаи театр, кино ва телевизион яке аз бонуфузтарин сохторҳои асосии Донишкадаи давлатии фарҳанг ва санъати Тоҷикистон ба номи Мирзо Турсунзода ба шумор рафта, самти фаъолияташ ба тайёр намудани мутахассисони соҳаи театр, синамо ва телевизион нигаронида шудааст. Вазифаи асосии факулта тайёр намудани кадрҳои баландихтисоси соҳавӣ барои минбаъд фаъолият кардан дар саҳнаи театрҳои касбӣ, синамои ватанию хориҷӣ ва саривақт таъмин намудани омма ба навтарин иттилооти дохилу хориҷи кишвар тавассути расонаҳои иттилоотӣ мебошад. Айни ҳол декани факултаи театр, кино ва телевизион, дотсент Рустамҷон Воҳидов мебошад.

Кафедраҳои тахассусӣ[вироиш]

Факулта дар ҳайати худ ду кафедраи тахассусӣ дорад:

Факултаи театр, кино ва телевизион аз рӯи ду ихтисос:

  • 1-23 01 08-02-01- Рӯзноманигори телевизион
  • 1-17 01 01 01- Актёри театри драма ва кино мутахассисон тайёр карда мешаванд.

Устодону донишҷӯёни факулта[вироиш]

Дар факултаи театр, кино ва телевизион зиёда аз 400 нафар донишҷӯён дар шакли таҳсили рӯзона ва ғоибона аз ҷумҳурӣ таҳсил доранд. Ба донишҷӯён 3 профессор, 4 нафар Ҳунарпешагони халқии ҶТ, 2 нафар Ҳунарпешаи шоистаи ҶТ, 5 нафар номзади илмҳо, 4 нафар дотсент ва саромӯзгору омӯзгорон дарс мегӯянд. Кормандони маъруфи саҳнаи тоҷик-Ҳоҷиқул Раҳматуллоев, Борис Бибиков, Аслӣ Бурҳонов, Аскар Абдураҳмонов, Меҳрубон Назаров, Аҳмад Бобоқулов, Маҳрам Файзов, Малика Ҷурабекова, Дилбар Абдушукуров, Ҳошим Гадоев, Аҳмадҷон Қодиров, Фаррух Қосимов, Султон Сафаров, Маҳмудҷон Воҳидов, Салоҳиддин Солеҳов дар солҳои гуногун дар факулта ба шогирдон дарс гуфтаанд. Имрӯз устодони саҳнаи театрӣ ба монанди Тағоймурод Розиқов, Раҷабгул Қосимова, Шералӣ Абдулқайсов, Майрам Исоева, Қурбони Собир, Давлат Убайдуллоев, Исо Абдурашидов, Гулчеҳра Нуъмонова, Муҳаммадҷон Шодиев, Абдулҳафиз Қодиров анъанаҳои устодонро идома медиҳанд.

Сохтор ва дастпарварони шуъбаи маҳорати актёрӣ[вироиш]

Дар шуъбаи маҳорати актёрӣ , ки актёрони театри драма ва киноро тайёр мекунад, шароити хуби таълимӣ ва эҷодӣ фароҳам оварда шудааст: театри таълимии донишкада, ду синфхонаи маҳорати актёрӣ, синфхонаи нутқи саҳнавӣ ва синфхонаи тағйири чеҳра (гримёр). Ҳар сол хатмкунандагони ин шуъба на кам аз се асарҳои драматургони тоҷик, рус ва аврупоро ҳамчун кори дипломӣ ба ҳайати комиссияи имтиҳони давлатӣ ва тамошобинон пешкаш мекунанд, ки сабти он аз шабакаҳои телевизионӣ намоиш дода мешавад. Хатмкунандагони шуъбаи мазкур имрӯзҳо дар театрҳои касбии вилоятҳо, шаҳру ноҳияҳо: Театри давлатии академӣ-драмавии ба номи Абулқосим Лоҳутӣ, Театри давлатии ҷавонон ба номи М. Воҳидов, Театри давлатии драмаи русии ба номи Владимир Маяковский, Театри давлатии таҷрибавии тамошобини ҷавон «Аҳорун» ба номи Муҳаммадҷон Қосимов, Театри давлатии мусиқӣ - мазҳакавии ба номи С. Вализодаи ш. Кўлоб, Театри давлатии мазҳакаи-мусиқии шаҳри Қурғонтеппа ба номи Ато Муҳаммадҷонов, Театри давлатии мазҳакаи-мусиқии шаҳри Хорӯғ ба номи М. Назаров, Театри ҷумҳуриявии мусиқӣ-драмавии ноҳияи Данғара, Театри давлатии «Лухтак», Театри мусиқӣ мазҳакавии ба номи Камоли Хуҷандӣи шаҳри Хуҷанд, Театри ҷумҳуриявии мусиқӣ-драмавии ба номи Маҳмудҷон Воҳидови ноҳияи Ашт,Театри мусиқӣ-драмавии шаҳри Конибодом ба номи Тӯҳфа Фозилова,Театри ҷумҳуриявии драма ва мазҳакаи русии ба номи А.С. Пушкини шаҳри Гулистони вилояти Суғд, Театри ҷумҳуриявии «Лухтак»-и шаҳри Гулистони вилояти Суғд, Театри драмаи мусиқии ӯзбекии ноҳияи Спитамен ба номи Ш.Бурҳонов, киностудияҳо, телевизион, Вазорати фарҳанг ва дар дигар муассисаҳои фарҳангӣ фаъолият мекунанд. Муҳлати таҳсил дар шуъбаи актёрӣ чор солро фаро гирифтааст. Барои дохил шудан ба шуъбаи акёри драма ва кино пеш аз ҳама довталаб бояд дорои қаду қомати баланд, ҳусни расо ва қобилияти хуби наттоқӣ ва суханварӣ , инчунин аз осори адибони классику муосир ва ҷаҳон воқиф ва аз таърихи забони худ огаҳ бошад. Довталаби шуъбаи актёри драма ва кино пеш аз супоридани имтиҳонҳои тестӣ имтиҳони эҷодиро дар худи донишкада месупорад. Имтиҳони тахасусӣ дар атрофи талаботи зерин доир мегардад:

  • Иҷро намудани этюд дар мавзӯъи аз ҷониби устодон пешниҳод шуда, нақл кардани зарбулмасал, мақол, тезгӯяк
  • Қироати порчаи насрӣ, шеър ва нақл намудани латифа ва тақлидкорӣ.
  • Қироати шеър аз шоирони классикӣ ва муосир
  • Қироати порчаи насрӣ аз асарҳои бадеӣ
  • Масалҳо
  • Хондани суруд
  • Иҷро намудани рақс
  • Иҷро намудани этюде, ки довталаб омода кардааст
  • Санҷиши қувваи ҳофиза ва ритм
  • Мушоҳидакорӣ, шунидан, дидан ва баҳо додан.
  • Навохтан дар сози мусиқӣ (барои онҳое, ки навохта метавонанд)
  • Қобилияти расмкашӣ

Сохтор ва устодони шуъбаи рӯзноманигори телевизион[вироиш]

Устодони шуъбаи рӯзноманигории телевизиони факулта дар тарбияи насли нави рӯзноманигорони телевизион таҷрибаи бой дорад ва хатмкунадагони он имрӯзҳо дар Шабакаҳои мухталифи радио ва телевизиони Тоҷикистон, дар Вазорату идораҳо (масъулони иттилоот) қисмҳои ҳарбӣ ва умури дохилӣ, корхонаҳои калони саноатӣ пурсамар фаъолияти эҷодӣ мебаранд. Барои дақиқ омӯхтани касби рӯзноманигорӣ дар Донишкада студияи радио, лабораторияҳои танзим, суратгирӣ ва наворбардорӣ дар ихиёри донишҷӯён аст. Ба донишҷӯён журналистон, когардонҳо ва наворбардорони варзида ва собиқадор, ки соҳиби таҷрибаи бойи эҷодӣ ва касбӣ ҳастан аз қабили Зулфиддин Мӯъминҷонов, Гавҳар Умарова, Бахтиёр Ҳамдамов, Чорёр Иброҳимов, Ҷумъа Қуддусов, Тағоймурод Орифӣ, Саид Қодирӣ, Шералӣ Нағзалиев, Хушбахт Беков, Баҳодур Истамов, Хусрав Худойназаров, Лутфулло Ниёзов, Адиба Абдуллоева дарс мегӯянд. Донишкада барои фароғати хуби донишҷӯён чорабиниҳои фарҳангӣ аз қабили консертҳо вохӯриҳо мулоқотҳо бо шахсиятҳои маъруфи Тоҷикистон ва берун аз марзи Тоҷикистон ташкил ва баргузор менамоянд. Таҳсил дар шуъбаи рӯзноманигори телевизион дар шакли рӯзона ва ғоибона ба роҳ монда шудааст. Шумораи умумии донишҷӯён ҳам дар шуъбаи рӯзона ва ҳам дар шуъбаи ғоибона зиёда аз 350 нафар мерасад. Донишҷӯёни кафедраи мазкур дар якҷоягӣ бо устодон барномаҳои гуногуни, сиёсӣ, иқтисодӣ, фарҳангӣ, варзишӣ ва интеллектуалӣ таҳия намуда, пешкаши тамошобинон менамоянд. Муҳлати таҳсил дар шуъбаи рӯзноманигори телевизион чор сол аст.

Шуъбаи магистратура ва аспирантура[вироиш]

Дар факултаи театр, кино ва телевизион шуъбаи магистратура ва аспирантура амал мекунад ва таълимгирандагони он аз ҳисоби хатмкунандагони шуъбаҳои рӯзноманигорию актёрӣ ва ҳамчунин аз ҳисоби хатмкардагони шуъбаи рӯзноманигории донишкадаю донишгоҳҳои ҷумҳурӣ мебошанд.

Манбаъ[вироиш]

Сомонаи донишкада

Эзоҳ[вироиш]