Бобохон Ҳамдамов

Мавод аз Википедиа — донишномаи озод
Jump to navigation Jump to search
Бобохон Ҳамдамов

Бобохон Ҳамдамов (2 декабри 1902, дар деҳаи Ярм, ноҳияи Кӯҳистони Масчо — 2 декабри 1972, ҶШС Тоҷикистон) — ходими давлатии тоҷик, аввалин раиси Суди Олии Тоҷикиситон.

Зиндагинома[вироиш]

Бобохон Ҳамдамов 2 декабри соли 1902 дар деҳаи Ярми Кӯҳистони Масчо, дар оилаи камбағал таваллуд шудааст. Дар бистсолагӣ бо хоҳиши худ ба сафи Артиши сурх ворид шуда, бар зидди босмачиён дар Масчо, Ӯротеппа (ҳоло Истаравшан), Ғончӣ, Шаҳристон, Ғарм, Регар, Яғноб, Шаҳринав, Пахтаобод, Ҷиргатол, Данғара, Ховалинг ва Шӯрообод муборизаҳои беамон бурдааст.

Бобохон Ҳамдамов аввалин ташкилкунандаи ноҳияи Ғозималик мебошад. Соли 1925 ӯро ба вазифаи раиси Шӯрои ҷамоатҳои Палдорак ва Ланглифи ноҳияи Масчо, сипас раиси Кумитаи иҷроияи Шӯрои депутатҳои меҳнаткашони вилояти Уротеппаву Панҷакент таъйин карданд. Бобохон Ҳамдамов соли 1926 ба сафи Ҳизби коммунист қабул шуд ва соли 1929 дар вазифаи ҷонишини раиси Округи Кумитаи иҷроияи Кӯлоб хизмат карда, ҳамзамон дар ноҳияҳои Данғара ва Арал чун намояндаи Кумитаи Марказии Ҳизби Коммунисти Тоҷикистон фаъолият дошт.

Мавсуф дар таъсиси шӯроҳо, кушодани мактабҳои аввалин, сохтани роҳҳо, ислоҳоти замин, ташкили хоҷагиҳо ва ҷамъоварии ҳосил дар Кангурт, Данғара ва Қизилмазор хидмати содиқона кардааст. 26 октябри соли 1929 бо қарори КИМ Тоҷикистон Суди Олӣ таъсис ёфт ва аввалин раиси он Бобохон Ҳамдамов таъйин гардид, ки қаблан раиси суди округи Ӯротеппаро ба зимма дошт. Аз моҳи майи соли 1932 то июли соли 1933 бо пешниҳоду тавсияи КМ дар вазифаи раиси шаҳри Сталинобод (Душанбе) кор кард. Баъди сафари Бобохон Ҳамдамов ба шаҳри Ленинград (ҳозира Санкт-Петербург) ва мушоҳидаи биноҳои муҳташам, кӯчаву хиёбонҳои зебо дар Душанбе кӯчаҳо замонавӣ шуданду биноҳои зебо қомат афрохтанд.

Соли 1933 Бобохон Ҳамдамовро туҳмат карда, 8 моҳ ба ҳабс гирифтанд. Бори дуюм аз соли 1937 то соли 1939 дар зиндон буд. Бегуноҳиаш исбот гардида, бо қарори Ҳизби коммунисти Тоҷикистон боз ба сафи он пазируфта шуд. То соли 1944 вазифаи раиси хоҷагии Коммунаро ба уҳда дошт. Аз соли 1944 то соли 1949 намояндаи масъули Вазорати маҳсулоттайёркунӣ, сардори идораи хоҷагии қишлоқ ва раиси Ҷамъияти матлуботи ноҳияи Масчо буд.

Солҳои 1949—1954 раиси хоҷагии ба номи Андрееви ноҳияи Кӯҳистони Масчо, солҳои 1954—1959 ҷонишини раиси колхози «Ленинград»-и ноҳияи Пролетар (Ҷаббор Расулов) ва аз соли 1959 то ба нафақа баромаданаш (соли 1961) раиси хоҷагии «Янгитурмуш»-и ноҳияи мазкур буд.

Ҷоизаҳо[вироиш]

Бобохон Ҳамдамов бо ордену медал ва ҷоизаҳо, аз ҷумла орденҳои Байрақи Сурхи Меҳнат, «Нишони фахрӣ», медалҳои «Барои меҳнати шоён дар Ҷанги Бузурги Ватании солҳои 1941—1945», «Барои меҳнати шуҷоатнок», ифтихорномаҳои фахрии КМ ПК Тоҷикистон, Президиуми Шӯрои Олӣ ва Шӯрои Вазирон қадр шудааст.

Даргузашт[вироиш]

Бобохон Ҳамдамов 2 декабри соли 1972 даргузашт. Ӯро дар қабристони деҳаи Зарафшони ноҳияи Ҷаббор Расулов дафн карданд.

Некдошт[вироиш]

Мувофиқи қарори мақомоти иҷроияи маҳаллии ҳокимияти давлатии ноҳияи Ҷаббор Расулов аз 3 сентябри соли 1995 дар хоҷагии ба номи Бобохон Ҳамдамов нимпайкараи биринҷӣ гузошта шуд. Ҳамчунин, мувофиқи қарори мақомоти иҷроияи ҳокимияти давлатии шаҳри Душанбе, аз 1 феврали соли 1995, маҳаллаи Зарафшон, дар ноҳияи Кӯҳистони Масчо, хоҷагӣ ва яке аз кӯчаҳои марказии шаҳри Бӯстони ноҳияи Масчо ба номи Бобохон Ҳамдамов гузошта шуд.

Эзоҳ[вироиш]

Сарчашма[вироиш]