Муқаддас Набиева

Мавод аз Википедиа — донишномаи озод
Jump to navigation Jump to search
Муқаддас Набиева
Муқаддас Набиева
Санаи таваллуд

7 январ 1950(1950-01-07)

Зодгоҳ

ноҳияи ФархорҶШС Тоҷикистон

Санаи марг

1979(1979)

Маҳалли марг
Солҳои фаъолият

1973-1979

Кишвар

 ҶШС Тоҷикистон

Касб(ҳо)

сарояндаи эстрада

Муқаддас Набиева (тав. 7 январи соли 1950 ноҳияи Фархор – ваф. 1979, вилояти Суғд) —сарояндаи Дастаи эстрадии «Гулшан», Ҳунарпешаи хизматнишондодаи ҶШС Тоҷикистон (1977).

Зиндагинома[вироиш]

Муқаддас Набиева 7 январи соли 1950 дар ноҳияи Фархор таваллуд шудааст, вале тарбиятгирифтаи мактаб-интернати рақами 10-и шаҳри Душанбе мебошад. Азбаски аз ҷавонӣ духтараки чолок ва ҷасуру серғайрат буд, ӯро тез-тез ба чорабиниҳои варзишӣ ҷалб мекарданд. Пас аз хатми мактаб-интернат вай ба Институти тарбияи ҷисмонӣ дохил шуда, соли 1972 онро хатм намуд ва дар мактаби ибтидоии варзишии ноҳияи Фархор ба ҳайси тренер ба кор шурӯъ кард, аммо шавқу завқи сарояндагӣ ҳамоно қалбашро ором намегузошт. Ҳамин буд, ки Муқаддас дар баробари тренерӣ бо дастаи ҳаваскорони санъати хонаи маданияти Фархор пайваста, дар ҷашну чорабиниҳои мухталиф ширкат меварзид.

Эҷодиёт[вироиш]

Истеъдоди Худодод ва садои гуворою дилнишинаш, ки дар илми мусиқӣ онро сопранои лирикӣ мегӯянд, ба зудӣ ин духтараки резапайкарро шуҳратёр сохт ва овозаи Муқаддас аз Фархор то ба Душанбе расид. Соли 1973 нахустин озмуни эҷодиёти халқ – “Бӯстон-1” баргузор гардид ва Муқаддас Набиева дар он суруди «Республикаи ман»-ро иҷро кард. (Он замон аллакай хоҳари калонии Муқаддас Сабоҳат Қосимова ҳаёти худро бо Фаррух Қосимов пайваста, ҳар ду дар санъати тоҷик шуҳратёр шуда буданд.) Роҳбарияти ансамбли эстрадии «Гулшан», ки сарвараш Орифшо Орифов буд, истеъдоди волои ин духтараки ҷавонро дида, ӯро ба ҳайси яккахон ба кор қабул намуданд.[2] Муқаддас Набиева соли 1974 ба Дастаи эстрадии «Гулшан» пайваста, дар як муддати кӯтоҳ дар ин ансамбл инқилоб кард. Муқаддас дар ҳунари сарояндагӣ, махсусан дар санъати эстрада роҳи наву сабки хоси сурудхонӣ кушод. Сурудҳои ӯ бо форамию салосат ва зарбу оҳанги дилнишинашон ба зудӣ дар хотири шунавандагон нақш мебастанд. «Кӯи ту» (шеъри Авҳадии Мароғаӣ), «Хуршеди ҳаёт» (ғазали Ҳилолӣ), «Нури ман» (ғазали Мавлонои Румӣ) «Шарораи хотираҳо» (халқӣ), «Боди сабо» (Зебунисо), «Садои дил» (Аъзам Сидқӣ), «Ба ишқат интизорам» (Гулрухсор), «Дили зорам» (халқӣ), «Муҳаббат нест бе оташ» (Сайдалӣ Маъмур) ва даҳҳо таронаҳои дигари Муқаддас, ки теъдоди умумиашон ба 50 мерасад, то имрӯз куҳна нашуда, маҳбубият доранд. Муқаддас Набиева дар баробари таронаҳои тоҷикӣ ҳамчунин бо забонҳои русӣ (суруди «Надежда), арманӣ («Суруди ман»), туркӣ, қирғизӣ суруд хонда, дар саросари кишвари паҳновари Шӯравӣ шуҳратёр шуд. Дар ҳайати «Гулшан» Муқаддас соли 1975 ба Фаронса, соли 1977 ба Полшаю Эстония ва дигар давлатҳо сафари ҳунарӣ намуда, нисфи ҷаҳонро қоил кард.[3]

Даргузашт[вироиш]

Муқаддас Набиева соли 1979 ҳангоми сафар бо ҳамроҳи ҳамкоронаш ба вилояти Суғд даргузашт. Дар роҳ мошини онҳо сарозер шуд ва ин сарояндаи шуҳратёри тоҷикро, ки ҳамагӣ 29 сол дошт, аз миён бурд.

Нигаред[вироиш]

Эзоҳ[вироиш]

  1. 1.0 1.1 http://life.ansor.info/muqadas_nabieva_ru/
  2. Асрори марг ва ишқи пинҳонии Муқаддас Набиева(тоҷ.). tajikistantimes.com. 2018-09-28. 6 январи 2019 санҷида шуд.
  3. Асрори марг ва ишқи пинҳонии Муқаддас Набиева(тоҷ.). tajikistantimes.com. 2018-09-28. 6 январи 2019 санҷида шуд.