Киану Ривз

Аз Википедиа
Ҷаҳиш ба: новбари, Ҷустуҷӯи
Keanu Reeves
Киану Ривз
Зодрӯз 2 сентябр, 1964
Зодгоҳ {{{Зодгоҳ}}}

Киану Ривз (англисӣ: Keanu Reeves) 2—ми сентябри соли 1964 дар шаҳри Бейрути Лубнон ба дунё омадааст. Падари ӯ геолог Сэмюэл Ноулин Ривз ва модараш раққоса Патрисия Тэйлор аст. Аҷдодони Ривз аз Гавайи, Ирландия, Англия ва ҳатто Чин будаанд. Маънои номи «Киану» дар забони гавайи «шамоли форами кӯҳ» аст.

Дар аввалҳои ҳаёти эҷодиёташ Ривз дар филмҳо бо номҳои К. С. Ривз, Норман Ривз ва Чак Спадина баромад кардааст.

Волидайни Киану соли 1966 аз ҳам ҷудо шуданд; модараш бо фарзандон соли 1969 ба Ню-Йорк меояд ва ба коргардон Пол Аарон хонадор мешавад. Онҳо низ соли 1971 аз ҳам ҷудо мешаванд ва оила ба шаҳри Торонтои Канада меоянд, ки дар ин ҷо Ривз ба воя мерасад. Киану шаҳрванди Британияи Кабир ва Канада мебошад. Дар ҷавонияш ҳунарманди оянда дар мағозаи маҳсулоти ордӣ кор кардааст. Дар давоми панҷ сол Ривз дар чор мактаб, аз ҷумла дар мактаби касби ҳунарпешагӣ, ки аз он хориҷ шуда буд, таҳсил кардааст. Ӯ дар сини 15 солагияш ба санъат рӯй овардааст.

Бори аввал Ривз ба экрани калон соли 1979 дар телевизиони Канада баромад кардааст. Дар аввали солҳои 1980-ум ӯ дар рекламаҳо (аз он ҷумла рекламаи Coca-Cola) ва филмҳои хурд дар бораи Торонто иштирок кардааст. Филми аввали Киану — «Хун ҷавонӣ» (соли 1985, коргардон Роб Лоуи) мебошад, ки дар он ӯ нақши дарвозабони хоккейро бозидааст. Баъд аз баромадани филм ӯ ба Лос-Анҷелес меояд ва бо кӯмаки падархонди собиқаш Пол Аарон дар ин ҷо маскан мегирад.

Баъд аз бозидани чанд нақшҳои ночиз ӯ дар филми «Дар соҳили дарё» (1986) иштирок мекунад ва ин филм дар байни ҷавонон шӯҳрат меёбад. Дар ибтидои солҳои 1990-ум Ривз дар филмҳои дорои буҷаи калон, аз қабили «Дар мавҷ» (1991) ва «Суръат» (1994) иштиирок меварзад ва шӯҳрати ҷаҳониро пайдо мекунад. Филми фантастикии «Матритса» (1999) Ривзро ба қатори беҳтарин ҳунарпешагони Ҳолливуд ворид месозад. Дар фосилаи байни баромадани филми «Матритса» ва давоми он, Ривз дар якчанд филмҳо ба мисли «Мушоҳидагар», «Ноябри ширин» ва «Ҳардбол» ширкат варзид, ки аз тарафи тамошобинон хуб пазируфта нашуд. Вале ду филми давоми «Матритса» ва филми «Константин» (2005) хеле комёб шуданд ва таваҷҷӯҳи дӯстдорони синаморо ба Ривз боз баргардонданд.