Рамзҳои давлатии Тоҷикистон

Парчами давлатии Ҷумҳурии Тоҷикистон		Нишони давлатии Ҷумҳурии Тоҷикистон

Суруди миллии Ҷумҳурии Тоҷикистон

Диёри арҷманди мо,
Ба бахти мо сари азизи ту баланд бод,
Саодати ту, давлати ту бегазанд бод,
Зи дурии замонаҳо расидаем,
Ба зери парчами ту саф кашидаем, кашидаем.

Зинда бош, эй Ватан,
Тоҷикистони озоди ман!

Барои ному нанги мо
Ту аз умеди рафтагони мо нишонаӣ,
Ту баҳри ворисон ҷаҳони ҷовидонаӣ,
Хазон намерасад ба навбаҳори ту,
Ки мазраи Вафо бувад канори ту, канори ту.

Зинда бош, эй Ватан,
Тоҷикистони озоди ман!

Ту модари ягонаӣ,
Бақои ту бувад бақои хонадони мо,
Мароми ту бувад мароми ҷисму ҷони мо,
Зи ту саодати абад насиби мост,
Ту ҳастиву ҳама ҷаҳон ҳабиби мост, ҳабиби мост.

Зинда бош эй Ватан,
Тоҷикистони озоди ман!

Гулназар Келдӣ

Рамзҳои давлатии Ҷумҳурии Тоҷикистон — аломатҳои фарқкунандаи давлати Тоҷикистон мебошанд, ки қонуни конститутсионӣ муқаррар кардааст.

Ба рамзҳои давлатӣ инҳо дохил мешаванд:

• Парчами Тоҷикистон
• Нишони Тоҷикистон
• Суруди миллии Тоҷикистон

Эҳтироми рамзҳои давлатӣ

Эҳтироми волои Парчам, Нишон ва Суруди Миллӣ, аз он ҷумла аз ёд донистани Суруди Миллӣ, ифтихори миллии ҳар як шаҳрванди Ҷумҳурии Тоҷикистон мебошад. Дар ҳама ҳолат ба рамзҳои давлатӣ бояд тавре муносибат намуд, ки нисбат ба онҳо беҳурматӣ зоҳир нагардад.

Тасдиқи рамзҳои давлатӣ

Парчам, Нишон ва матну оҳанги Суруди Миллиро Маҷлиси намояндагони Маҷлиси Олии Ҷумҳурии Тоҷикистон тасдиқ менамояд.

Ҷавобгарӣ барои таҳқири рамзҳои давлатӣ

Шахсони воқеӣ ва ҳуқуқӣ барои вайрон кардани талаботи Қонуни ҶТ «Дар бораи рамзҳои давлатии Ҷумҳурии Тоҷикистон» ва таҳқири рамзҳои давлатии Ҷумҳурии Тоҷикистон мувофиқи қонунгузории Ҷумҳурии Тоҷикистон ба ҷавобгарӣ кашида мешаванд.