Ноҳияи Бохтар

Мавод аз Википедиа — донишномаи озод
Ҷаҳиш ба: новбари, Ҷустуҷӯи
Ноҳияи Бохтар
Мамлакат

 Тоҷикистон

Унвон

Ноҳияи маъмурӣ

Тобеи

Вилояти Хатлон

Шомили

3 шаҳрак, 5 ҷамоат

Маркази маъмурӣ

Исмоили Сомонӣ

Санаи таъсис

17 январи соли 1944

Забони расмӣ

тоҷикӣ

Аҳолӣ (2016)

224 600 нафар

Гурӯҳҳои миллӣ

тоҷикон, ӯзбакҳо, русҳо

Гурӯҳҳои динӣ

мусулмонон: суннӣ-ҳанафӣ, масеҳиён

Масоҳат

578,9 км²

Location of Bokhtar District in Tajikistan.png

Минтақаи замонӣ

UTC+5

Сарвожа

BO

Коди ISO 3166-2

TJ.KL.BO

Коди телефон

+992 3245

Нишонаи почта

735140

Домени Интернет

.tj

Шумораи мошинҳо

TJ03

Ноҳияи Бохтар

Координатаҳо: 37°45′52″ а. шм. 68°48′00″ т. шқ. / 37.7645320000000027° а. шм. 68.80001300000000696855° т. шқ. / 37.7645320000000027; 68.80001300000000696855 (G) (O)

Ноҳияи Бохтар (Коммунистӣ, то 12 марти 1992) — яке аз ноҳияҳои маъмурии вилояти Хатлони Ҷумҳурии Тоҷикистон. Маркази ноҳия – шаҳраки Исмоили Сомонӣ (то 13 ноябри 1998 шаҳраки Октябр) 15 км ҷанубтар аз шаҳри Қурғонтеппа ҷойгир аст.

17 ноябри 1980 таъсис ёфтааст. Масоҳаташ 578,9 км2. Аҳолиаш 232 ҳазор нафар (2013). Аз маркази ноҳия то маркази вилояти Хатлон – шаҳри Қӯрғонтеппа 8 км, то шаҳри Душанбе 100 км.[1]

Ҷойгоҳ[вироиш]

Ҳудуди ноҳия, асосан, дар водии Вахш ҷойгир буда, сатҳаш ҳамвор ва иборат аз пуштаву адирҳост. Дар шимол бо ноҳияи Ҷомӣ, дар шарқ — бо ноҳияи Сарбанд ва ноҳияи Вахш, дар ғарб — бо ноҳияи Хуросон ва дар ҷануб — бо ноҳияи Румӣ аз ноҳияҳои вилояти Хатлон ҳаммарз аст.

Иқлим[вироиш]

Баландиаш аз сатҳи баҳр 400–1200 м. Иқлимаш хушки субтропикӣ. Ҳарорати миёнаи июл 24–300С, январ 0–10С. Боришоти солона – 250–300 мм. Дарёи асосиаш Вахш. Хоки ҳудуди ноҳия, асосан, хокистарранги равшан, хокистарранги муқаррарӣ ва марғзорист.

Табиат[вироиш]

Олами наботот[вироиш]

Дар пастиву доманакӯҳҳо набототи биёбонию нимбиёбонӣ, дар баландиҳои зиёда аз 800 м рустаниҳои даштӣ мерӯянд. Дар соҳилҳои рӯди Вахш аҳёнан тӯғайзор ба назар мерасад.

Таърих[вироиш]

Бохтар аз соли 1937 то соли 1959 ноҳияи Октябри собиқ вилояти Қӯрғонтеппа, аз соли 1959 то 6 январи 1965 шаҳраки Октябри ноҳияи Қӯрғонтеппа, то 17 октябри 1980 шаҳраки Октябри ноҳияи Вахш, то 12 марти 1992 ноҳияи Коммунистӣ буд. Бо қарори Шӯрои Олии Ҷумҳурии Тоҷикистон барои бузургдошти арзишҳои миллӣ ва поси мероси таърихӣ аз 12 марти 1992 ноҳияи Коммунистӣ номи Бохтарро гирифт.

Ҳудудҳои Бохтари кунунӣ тайи асрҳои миёна ва минбаъд аслан тобеи Хатлон ва ҳокимони Қубодиён буда, таърихан дар ҳудуди шаҳрҳои қадимии Вахш, Леваканд ва Ҳаловард мавқеъ доштааст. Истахрӣ дар «Мамолику-л-масолик» ҳудудҳои ш-ҳои Ҳаловарду Леваканд ва дигар деҳоту шаҳракҳои атрофи онро дар фосилаи думанзилии канораи рӯди Вахшоб қаламдод кардааст. Муаллифи «Ҳудуду-л-олам» навиштааст, ки минтақаи Вахш ва деҳоти атрофи он паҳновару ободон ва пурфайз буда, Ҳаловард мавзеи бо кишту варз ва хушҳаво, Леваканд макони гӯсфандони ваҳшӣ будааст. Дар замони Ғуриён ин минтақа аз тобеоти давлати мазкур буд. Минтақаи Бохтар ва деҳоти атрофи он бар асари ихтилофу ҳангомаҳои таърихӣ ва давлатдориҳои минбаъда зери тобеияти ҳокимони Хатлон, Вахш ва Қубодиён қарор доштанд ва дертар дар аҳди давлатдории Манғитиён ба ҳудудҳои Аморати Бухоро дохил гаштанд. Баъди обёрии заминҳои водии Вахш ва ривоҷёбии пахтакорӣ дар аҳди Шӯравӣ Бохтар хеле обод шуда, ба макони парвариши пахтаи маҳиннах ва истеҳсолу коркарди он табдил ёфт.

Мардум[вироиш]

Мардуми Бохтар ба забонҳои тоҷикӣ ва узбакӣ сухан мегӯянд. Бар пояи омори соли 2016, ноҳияи Бохтар 224 600 ҳаз. тан ҷамъият дошт.[2].

Бахшбандӣ[вироиш]

Бар асоси Қонуни тақсимоти кишварӣ, ноҳияи Бохтар 3 ҷамоати шаҳрак (Бохтариён, Бӯстонқалъа, Исмоили Сомонӣ), 5 ҷамоати деҳот (Ориён, Заргар, Сарвати Истиқлол, Меҳнатобод, Навбаҳор) дорад[3]:

Ҷамоатҳои ноҳияи Бохтар
Ҷамоат Аҳолӣ
Исмоили Сомонӣ (шаҳрак)
Бӯстонқалъа (шаҳрак)
Ҷамоати Ориён (н. Бохтар)
Ҷамоати шаҳраки Бохтариён
Ҷамоати Сарвати Истиқлол
Ҷамоати Навбаҳор (н. Бохтар)
Ҷамоати Меҳнатобод (н. Бохтар)
Ҷамоати Заргар

Ҳукумат[вироиш]

Сарвари ноҳияи Бохтар Раиси Ҳукумати он аст ки вайро Раиси Ҷумҳурии Тоҷикистон таъйин мекунад. Ниҳоди қонунгузори ноҳияи Бохтар Маҷлиси намояндагони халқӣ мебошад ки онро раъйдиҳандагони ноҳияи Бохтар барои 5 сол интихоб мекунанд.

Иқтисордиёт[вироиш]

Кишоварзӣ[вироиш]

Бохтар аслан ноҳияи кишоварзӣ буда, соҳаи муҳимми хоҷагидории онро пахтакорӣ, махсусан, навъҳои маҳиннах, ташкил медиҳад. Ҳамчунин, ғаллакорӣ (гандум, ҷав, ҷуворимакка, шолӣ ва ғайра), боғу токпарварӣ, сабзавоткорӣ, лимупарварӣ, кишти зироатҳои хӯроки чорво, пилапарварӣ, занбӯрпарварӣ, чорводорию парандапарварӣ тараққӣ кардаанд. Ноҳия 561 хоҷагии деҳқонӣ (фермерӣ), 7 хоҷагии ёрирасон, 5 хоҷагии давлатӣ, 10 ширкати кишоварзӣ дорад. Майдони умумии заминҳои кишоварзӣ 17948 га (2012), аз ҷумла, заминҳои обӣ 17948 га, аз ҳамин ҳисоб замини пахта 12501 га, ғаллаву ҷуворимакка 2774 га, сабзавот

651 га, полезиҳо 189 га, картошка 189 га, боғзор 200 га, токзор 9 га-ро ташкил медиҳанд. Заминҳо, асосан, аз наҳри Вахш обёрӣ мешаванд. Чорводорӣ яке аз соҳаҳои муҳим буда, саршумори чорво дар хоҷагиҳои деҳқонӣ чунин аст (соли 2012, ба ҳисоби сар): гов – 3929, гӯсфанду буз – 10983, асп – 105, паранда – 3575. Дар ноҳия соли 2011-ум 212 т гӯшт, 792 т шир, 5300 дона тухм, 24,6 т пашм, 19,3 т асал, 13607 т сабзавот, 5024 т полезиҳо, 580 т меваҷот, 629 т ангур, 4086 т картошка, 10056 т ғалладона, 29520 т пахта истеҳсол шудааст.

Саноат[вироиш]

Дар ҳудуди ноҳия 13 муассисаи саноатӣ, 8 корхонаи бинокорӣ, 10 муассисаи хидматрасон, 2 муассисаи хӯроки умумӣ, 24 толори варзиш, 2 ҳавзи шиноварӣ, 109 майдони варзиш, варзишгоҳи марказӣ, мактаби варзиш, муассисаи нақлиётӣ, хоҷагии манзилию коммуналӣ, хоҷагии об, Ассотсиатсияи истифодабарандагони об, бахшҳои алоқаи ҶС «Тоҷиктелеком », бахши Департаменти давлатии «Почтаи Тоҷикистон», корхонаҳои нонпазӣ, хонаҳои хидмати маишӣ, 34 нуқтаи савдои хусусӣ фаъолият доранд. Корхонаҳои саноатии ноҳия: заводи нон, корхонаи хусусии истеҳсоли хишти «Сиддиқ», ҶММ «Континентал», матбаа, ҶДММ «Ресандаи Хатлон», ҶДММ «Ганҷи Вахш», ҶММ «Ситораи Шарқи Озод», КВД «Аэропорт», корхонаҳои коркарди пахтаи «Бахтиёр», «Заргари Тоҷиддин», «Файзалӣ Саидов», ҶДММ «Котон-Асрор» ва «Котон-Суҳроб», ҶДММ «Фароз» (коркарди решаи ширинбия).

Нақлиёт[вироиш]

Аз ҳудуди ноҳия роҳи оҳани Тирмиз – Қӯрғонтеппа мегузарад. Аэропорти шаҳри Қӯрғонтеппа дар ҳудуди Бохтар воқеъ аст.

Маориф[вироиш]

Соли хониши 2011–12 дар ноҳия литсей, коллеҷ, гимназияи давлатӣ, 9 муассисаи томактабӣ, мактаб-интернати хусусии кӯдакони ятим, мактаби мусиқӣ, мактаби президентӣ барои талабагони болаёқат, инчунин, 67 мактаб, аз ҷумла 57 мактаби таҳсилоти миёнаи умумӣ, 5 мактаби таҳсилоти умумии асосӣ, 8 мактаби ибтидоӣ фаъол буда, дар онҳо 48137 нафар талаба таҳсил мекарданд.

Тандурустӣ[вироиш]

Дар Бохтар соли 2012 беморхонаи марказӣ, 2 беморхонаи рақамӣ, 3 беморхонаи минтақавӣ, 20 маркази саломатии деҳотӣ, 39 бунгоҳи тиббӣ, 12 дорухона, Маркази ташаккули тарзи ҳаёти солим, Маркази мубориза бар зидди бемориҳои сил, Маркази солимии репродуктивӣ, Маркази пешгирии паҳншавии бемориҳои СПИД, Маркази бемориҳои пӯсту зуҳравӣ, Маркази тибби оилавӣ, Маркази бемориҳои тропикӣ, Маркази давлатии назорати беҳдоштӣ (санитарию эпидемиологӣ) фаъолият доштанд, ки дар онҳо 107 духтури маълумотиолидор ва 468 корманди маълумоти миёнаитиббидор ба мардум хидмат мерасонданд.

Фарҳанг[вироиш]

Ноҳия шуъбаи фарҳанг, 26 китобхона (дорои 155,5 ҳазор нусха китоб), 8 кохи фарҳанг ва гурӯҳи хидматрасонии ҳунарии назди шуъбаи фарҳанг дорад.

Матбуот[вироиш]

Рӯзномаи ноҳиявӣ – «Бохтар» (аз соли 1931 нашр мешавад).

Эзоҳ[вироиш]

  1. Энсиклопедияи Миллии Тоҷик, Ҷилди 3. БОЗ-ВИЧКУТ – Душанбе: Сарредаксияи илмии Энсиклопедияи Миллии Тоҷик, 2014, - с.128-130 // Абдураҳмонов Б., Тошева Ш.
  2. Численность населения Республики Таджикистан на 1 января 2016 года. Сообщение Агентства по статистике при Президенте Республики Таджикистан.
  3. Феҳристи номи маҳалҳои Тоҷикистон. — Душанбе: Сарредаксияи илмии Энсиклопедияи Миллии Тоҷик, 2013. — 332 с.

Адабиёт[вироиш]

  • Энсиклопедияи советии тоҷик. Ҷ. 8, Д., 1988;
  • Ғоибов Ғ. Таърихи Хатлон аз оғоз то имрӯз. Д., 2006;
  • Файзуллоҳи Муҳаммадӣ. Қӯрғонтеппа – нигини Вахшонзамин. Д., 2007;
  • Муҳаббатов Х., Раҳимов М. Географияи Тоҷикистон. Д., 2011;
  • Шиносномаи ноҳияи Бохтар. Бохтар, 2012.

Сарчашма[вироиш]


Энсиклопедияи Миллии Тоҷик Мақола дар асоси маводи Энсиклопедияи Миллии Тоҷик навишта шудааст.



Ноҳияҳои Хатлон
Ноҳияи Балҷувон · Ноҳияи Бохтар · Ноҳияи Вахш · Ноҳияи Восеъ · Ноҳияи Данғара · Ноҳияи Ёвон · Ноҳияи Кӯлоб · Ноҳияи Қубодиён · Ноҳияи Ҷайҳун · Ноҳияи Мӯъминобод · Ноҳияи Норак · Ноҳияи Носири Хусрав · Ноҳияи Панҷ · Ноҳияи Ҷалолиддин Балхӣ · Ноҳияи Сарбанд · Ноҳияи Темурмалик · Ноҳияи Фархор · Ноҳияи Ховалинг · Ноҳияи Хуросон · Ноҳияи Ҳамадонӣ · Ноҳияи Дӯстӣ · Ноҳияи Ҷомӣ · Ноҳияи Шаҳритус · Ноҳияи Шамсиддин Шоҳин